«Qara Shangyraق -7» قوعامدىق بىرلەستىگىنىڭ ءتورايىمى باديگۇل قاجىبەكقىزى شەت ەلدە تۇراتىن ەتنيكالىق قازاق ۇلتىنىڭ وكىلدەرىنە بەرىلەتىن مەملەكەتتىك گرانتتىڭ شەتەلدەن كەلگەن وزگە ۇلت وكىلدەرىنە تاراتىلىپ جاتقانىن ايتىپ، دابىل قاقتى، - دەپ حابارلايدى "ادىرنا" ۇلتتىق پورتالى.
بەلسەندىنىڭ ايتۋىنشا، مەملەكەتىمىز شەت ەلدە تۇراتىن ەتنيكالىق قازاقتاردىڭ ءبىلىم الۋىنا جىلىنا 550 گرانت (باكالاۆر -
490, ماگيستراتۋرادا - 50 دوكتورانتۋرادا - 10) بولەدى. سول گرانتقا ەتيكالىق قازاقتار قول جەتكىزە الماي، مەملەكەت تاراپىنان ۇسىنىلعان يگىلىكتەن قاعىلىپ جاتىر. ماسەلەن، بيىل "Enic-kazakhstan" جوعارى ءبىلىم بەرۋدى دامىتۋ ورتالىعى ارقىلى باكالاۆرعا بولىنگەن 490 گرانتتىڭ 120-سىن عانا قانداستار العان. قالعان ورىنداردى ۇلتى قازاق ەمەس افريكالىقتار، ۇندىستەر، اۋعاندىقتار، ت.ب تولتىرعان.
باديگۇل قاجىبەكقىزى، «Qara Shangyraق -7» قوعامدىق بىرلەستىگىنىڭ ءتورايىمى:
- قازاقستان شەت ەلدە تۇراتىن ەتنيكالىق قازاق جاستارىنىڭ ەلىمىزگە كەلىپ ءبىلىم الۋىنا بارلىق جاعدايدى جاساپ قويعان. مەكتەپ بىتىرگەن قۇجاتىندا ۇشتىك باعاسى جوق ءار قازاق بالاسى قۇجاتتارىن وتكىزىپ، دايىندىق كۋرستارىنا وقۋعا مۇمكىندىگى بار. ءبىر جىل، ارى كەتسە ەكى جىل دايىندىق كۋرسىن وقىپ، وسى جاقتىڭ جازۋ-سىزۋىن ۇيرەنسە بولدى، قالاعان وقۋ ورنىنا مەملەكەتتىك گرانتپەن وقۋعا تۇسە الادى. بىراق، 3 جىل قاتارىنان دايىندىق كۋرس وقىسا دا، تاپسىرعان ەمتيحاندارىنان جوعارى ناتيجە كورسەتسە دە، جۇزدەگەن جاس وقۋعا قابىلدانباي قالىپ جاتىر. بۇعان باستى سەبەپ - سىبايلاس جەمقورلىق. قولىندا بيلىگى بارلارعا پارا بەرمەيتىن ەتنيكالىق قازاقتىڭ ورنىن پارا بەرەتىن "افريكالىقتارمەن" تولتىرعان ءتيىمدى بولىپ وتىر...
باديگۇل قاجىبەكقىزى "قازاقستان حالىق پارتياسى" جانىنداعى "قانداستاردى ورتاعا بەيىمدەۋ ورتالىعىنىڭ" دا جەتەكشىسى. ول قانداستارعا زاڭدىق تۇرعىدا كومەك كورسەتىپ، شەتتەن كەلگەن اعايىننىڭ تەگىن ءبىلىم الۋىنا، ەل ىشىنە ءسىڭىسىپ كەتۋىنە سەپتەسىپ جۇرگەنىن ايتادى.
بەلسەندىنىڭ سوزىنە قاراعاندا، مەملەكەتتىڭ شەتتەن كەلگەن ەتنيكالىق قازاقتاردى تەگىن وقىتۋعا اقشا ءبولىپ وتىرعانىن كوپ قانداستارىمىز بىلمەيدى-ءمىس.
"بۇل يگىلىك تۋرالى كەڭ اۋقىمدا ناسيحات جاسالمايدى. سوندىقتان دا، شەت ەلدەن كەلگەن قانداستارعا، قازاق جاستارىنا بولىنگەن تەگىن وقۋ ۇستاعاننىڭ قولىندا، تىستەگەننىڭ اۋزىندا كەتىپ جاتىر. ول ازداي ەندى مىنە، قازاق ەلىنە وقيمىز دەپ ارمانداپ كەلىپ، دايىندىق كۋرستان ءوتىپ، جاقسى ناتيجە كورسەتىپ، تەگىن گرانتقا يە بولا الماي قانشاما جاستىڭ قۇقىعى تاپتالىپ جاتىر. ولاردىڭ تەگىن وقۋعا ءتۇسۋ قۇقىعىن قوعام بولىپ قورعاۋىمىز كەرەك" دەيدى بەلسەندى.
باديگۇل قاجىبەكقىزى دايىندىق كۋرسىن جاقسى وقىسا دا، وقۋعا تۇسە الماي قالعان جاستاردىڭ باسىن قوسىپ، دەپۋتاتتارعا شاعىم تۇسىرمەك. سونداي-اق، مەملەكەتتىڭ شەتەلدىكتەرگە بولگەن ءبىلىم گرانتىنىڭ كەمى 90 پايىزى ەتنيكالىق قازاق ۇلتىنىڭ وكىلدەرىنە بەرىلۋ كەرەكتىگى تۋرالى ماسەلە كوتەرىپ، اقورداعا حات جازباق.
قانات بىرلىكۇلى
"ادىرنا" ۇلتتىق پورتالى
