«Qara Shangyraq -7» qoǵamdyq birlestiginiń tóraıymy Bádıgúl Qajybekqyzy shet elde turatyn etnıkalyq qazaq ultynyń ókilderine beriletin memlekettik granttyń shetelden kelgen ózge ult ókilderine taratylyp jatqanyn aıtyp, dabyl qaqty, - dep habarlaıdy "Adyrna" ulttyq portaly.
Belsendiniń aıtýynsha, memleketimiz shet elde turatyn etnıkalyq qazaqtardyń bilim alýyna jylyna 550 grant (bakalavr -
490, magıstratýrada - 50 doktorantýrada - 10) bóledi. Sol grantqa etıkalyq qazaqtar qol jetkize almaı, memleket tarapynan usynylǵan ıgilikten qaǵylyp jatyr. Máselen, bıyl "Enic-kazakhstan" Joǵary bilim berýdi damytý ortalyǵy arqyly bakalavrǵa bólingen 490 granttyń 120-syn ǵana qandastar alǵan. Qalǵan oryndardy ulty qazaq emes afrıkalyqtar, úndister, aýǵandyqtar, t.b toltyrǵan.
Bádıgúl Qajybekqyzy, «Qara Shangyraq -7» qoǵamdyq birlestiginiń tóraıymy:
- Qazaqstan shet elde turatyn etnıkalyq qazaq jastarynyń elimizge kelip bilim alýyna barlyq jaǵdaıdy jasap qoıǵan. Mektep bitirgen qujatynda úshtik baǵasy joq ár qazaq balasy qujattaryn ótkizip, daıyndyq kýrstaryna oqýǵa múmkindigi bar. Bir jyl, ary ketse eki jyl daıyndyq kýrsyn oqyp, osy jaqtyń jazý-syzýyn úırense boldy, qalaǵan oqý ornyna memlekettik grantpen oqýǵa túse alady. Biraq, 3 jyl qatarynan daıyndyq kýrs oqysa da, tapsyrǵan emtıhandarynan joǵary nátıje kórsetse de, júzdegen jas oqýǵa qabyldanbaı qalyp jatyr. Buǵan basty sebep - sybaılas jemqorlyq. Qolynda bıligi barlarǵa para bermeıtin etnıkalyq qazaqtyń ornyn para beretin "afrıkalyqtarmen" toltyrǵan tıimdi bolyp otyr...
Bádıgúl Qajybekqyzy "Qazaqstan Halyq partııasy" janyndaǵy "Qandastardy ortaǵa beıimdeý ortalyǵynyń" da jetekshisi. Ol qandastarǵa zańdyq turǵyda kómek kórsetip, shetten kelgen aǵaıynnyń tegin bilim alýyna, el ishine sińisip ketýine septesip júrgenin aıtady.
Belsendiniń sózine qaraǵanda, memlekettiń shetten kelgen etnıkalyq qazaqtardy tegin oqytýǵa aqsha bólip otyrǵanyn kóp qandastarymyz bilmeıdi-mis.
"Bul ıgilik týraly keń aýqymda nasıhat jasalmaıdy. Sondyqtan da, shet elden kelgen qandastarǵa, qazaq jastaryna bólingen tegin oqý ustaǵannyń qolynda, tistegenniń aýzynda ketip jatyr. Ol azdaı endi mine, qazaq eline oqımyz dep armandap kelip, daıyndyq kýrstan ótip, jaqsy nátıje kórsetip, tegin grantqa ıe bola almaı qanshama jastyń quqyǵy taptalyp jatyr. Olardyń tegin oqýǵa túsý quqyǵyn qoǵam bolyp qorǵaýymyz kerek" deıdi belsendi.
Bádıgúl Qajybekqyzy daıyndyq kýrsyn jaqsy oqysa da, oqýǵa túse almaı qalǵan jastardyń basyn qosyp, depýtattarǵa shaǵym túsirmek. Sondaı-aq, memlekettiń sheteldikterge bólgen bilim grantynyń kemi 90 paıyzy etnıkalyq qazaq ultynyń ókilderine berilý kerektigi týraly másele kóterip, Aqordaǵa hat jazbaq.
Qanat Birlikuly
"Adyrna" ulttyq portaly
