پرەزيدەنت قاسىم-جومارت توقاەۆ كاسىپكەرلىكتى جان-جاقتى قولداۋ ءۇشىن ءتيىمدى تاسىلدەردى ۇسىنعان بولاتىن. اتاپ ايتقاندا، گرانتتار، شاعىن جانە جەڭىلدەتىلگەن نەسيەلەر بەرىلۋدە، دەپ جازدى "ادىرنا" ءتىلشىسى.
مەملەكەت باسشىسىنىڭ باستاماسىنىڭ اياسىندا، الماتى قالاسىندا قارقىندى جۇمىستار اتقارىلىپ، جەكە كاسىپ باستايمىن دەگەن جۇرتقا داڭعىل جول اشىلىپ جاتىر. وعان دالەل، 1600-گە جۋىق الماتىلىقتىڭ قايتارىمسىز گرانت الىپ، ءوز كاسىبىن باستاۋى.
مەملەكەتتەن قولداۋ تاۋىپ، جەكە ءىست باستاعانداردىڭ ءبىرى، الماتىلىق 29 جاستاعى دينارا اڭساتباەۆا - 4 بالانىڭ اناسى. ەڭ ۇلكەنى 5 جاستا بولسا، ەڭ كىشىسى ءبىر جارىمدا. 6 جىلدان بەرى بالا كۇتىمىنە بايلانىستى ۇيدە وتىرعان ول تىگىنگىشى ماماندىعىن بىتىرگەن. بىراق سۇيىكتى ىسىمەن بار بولعانى ءبىر جىل عانا اينالىسىپتى. دەگەنمەن ۇيدەگى تىرلىكتەن قولى قالت ەتە قالسا، بوس ۋاقىتىن وسى ىسكە ارنايدى. ال قايتارىمسىز گرانت كاسىپتى دوڭگەلەتىپ اكەتۋگە زور مۇمكىندىك بەرگەن. ول قۇجات تاپسىرعان سوڭ، بار بولعانى 2 اپتانىڭ ىشىندە قاراجات قالتاسىنا تۇسكەنىن ايتادى. كوپتەن بەرى ارمانداپ جۇرگەن جاڭا تىگىن ماشينالارىن ساتىپ الدى.
«مەن وعان كەستە تىگەتىن ماشينانى الدىم. سوسىن كەرەكتى قۇرال-جابدىقتار ساتىپ الدىم. ماشينانىڭ ارنايى باعدارلاماسىن وقىدىم. ول كەز كەلگەن ءسوزدى كەز كەلگەن زاتقا تىگىپ بەرەدى»، – دەدى كوپبالالى انا دينارا اڭساتباەۆا.
ءوز ىسىنە ۇقىپتى كەلىنشەكتىڭ بۇگىندە تۇراقتى كليەنتتەرى دە بار. كوپبالالى انا تۇتىنۋشىلاردىڭ سەنىمىن اقتاعانى ءۇشىن ءجيى تاپسىرىس تۇسەتىنىن ايتادى. ويتكەنى ول تىگىننىڭ ءتۇر-ءتۇرىن بىلەدى. جالپى جەتىسۋ اۋدانىندا دينارا سەكىلدى بيىل سۇيىكتى ءىسىن كاسىپكە اينالدىرعان 101 ادام بار. ولاردىڭ باسىم بولىگى تاتتىلەر پىسىرەتىن شاعىن كونديتەرلىك تسەح اشسا، ءبىرازى اتەلەنى ىسكە قوسقان.
«قىركۇيەك ايىندا 72 ادام العان. ولار ىستەرىن باستاپ كەتىپ جاتىر. ال قالعانى 30 شاقتى ادام. ولار جۇمىسىن جۇرگىزىپ جاتىر. ونى دا تەكسەرەتىن، قانداي دا كومەكتەر كەرەك بولاتىن بولسا، جۇمىسپەن قامتۋ ورتالىعى اينالىسادى»، – دەدى جەتىسۋ اۋدانى اكىمىنىڭ ورىنباسارى دانيار الكەبايۇلى.
قايتارىمسىز گرانت الۋ مۇمكىندىگىنە ەلىمىزدەگى كاسىپكەرلىكتى دامىتۋ ۇلتتىق جوباسى اياسىندا قول جەتىپ وتىر. ول جاستارعا، كوپبالالى انالارعا، از قامتىلعان، مۇگەدەك بالا اسىراپ وتىرعان وتباسىلارعا وزدەرىن تۇراقتى تابىسپەن قامتاماسىز ەتۋ ءۇشىن كومەك رەتىندە بەرىلەدى. قايتارىمسىز گرانت كولەمى - 400 ايلىق ەسەپتىك كورسەتكىش، ياعني 1 ملن 225 مىڭ تەڭگە. كاپيتالدى جاڭا بيزنەستى باستاۋعا نەمەسە بار كاسىپتى دامىتۋعا جۇمساۋعا بولادى. گرانت قاراجاتى نەسيە وتەۋگە، جەر تەلىمىن ساتىپ الۋعا بەرىلمەيدى.
ايتا كەتەيىك، الماتىدا بيىل 1600-گە جۋىق ادام قايتارىمسىز گرانت الىپ، ءوز كاسىبىن باستادى. ال بۇگىننەن باستاپ «بيزنەس باستاۋ» باعدارلاماسى ارقىلى ءبىلىمىن جەتىلدىرۋگە 4700-دەن اسا ادام ىنتا ءبىلدىردى.
