وقۋ جىلى قارساڭىندا حيدجاب داۋى ءورشيدى. زاڭ بار. بىراق سولقىلداقتاۋ. وقۋ-اعارتۋ ءمينيسترىمىز سول زاڭدى اينالىپ وتەتىن جول ىزدەپ جاتقانعا ۇقسايدى.
مينيستر ونلاين جينالىس وتكىزىپ جاتىر. وعان ءبىر ءدىني ازامات قاتىسىپ وتىر. ول اتاۋلى ونلاين شارانى قايدان ەستىپ قاتىسىپ وتىر؟ ويتكەنى، ول جيىندى قاراپايىم ازاماتتار تۇگىل جۋرناليستەر دە بىلگەن جوق. جانە ادەتتە ءبارىن ءجىتى قاداعالايتىن بيلىك ورگانى الگى ادامعا وكتەم-وكتەم ساۋال قويۋعا قالاي مۇمكىندىك بەرىپ قويدى؟ الگى كىسى حيدجاب ماسەلەسىن عانا كوتەرمەيدى، مەكتەپتەردە ۇلدارعا ناماز وقيتىن ورىندار دايىنداۋدى دا مينيسترگە “قاتال تاپسىرادى”. بىراق ءمينيسترىمىز بۇل ءسوزدى ەستىمەگەن سىڭاي تانىتادى.
مەن ءمينيستردىڭ ورنىندا بولسام، “اينالايىن، مەكتەپتە قايداعى ناماز وقيتىن ورىن؟” دەپ قارسى داۋىس كوتەرەر ەدىم. جوق، مينيستر ءتىپتى ولاي ەتپەيدى. بالكىم، ءۇنسىز قۇپتايدى دا. “ۇنسىزدىك - كەلىسۋ بەلگىسى” دەپ ورىستار بەكەر ايتپاسا كەرەك.
سونىمەن، مينيستر نە دەيدى؟ “بارىنشا ماسەلەنى شەشۋگە كۇش سالىپ جاتىرمىز، ورتاق ءبىر كەلىسىمگە كەلەمىز دەپ ۇمىتتەنەمىز. مۋفتياتپەن وسى ماسەلە تۋرالى ءجيى-ءجيى كەزدەسىپ، اقىلداسۋدامىز. ماعان حيدجاب كيەتىن بالالاردىڭ ءتىزىمى كەرەك. سونى ۇسىنىڭىزدار” دەيدى. زايىرلى مەملەكەتتىڭ بىلدەي وقۋ-اعارتۋ ءمينيسترى مۋفتياتپەن اقىلداسىپ، حيدجاب ماسەلەسىن شەشەتىندەي نە باسىمىزعا كۇن تۋدى؟ مۋفتيات ستاتۋسى شىنداپ كەلگەندە زاڭ تۇرعىسىنان ەلىمىزدەگى كوپ ۇيىمدارمەن بىردەي. ەكىنشىدەن، مينيستر ءدىني مەكەمەمەن اقىلداسىپ، باعىت-باعدارىن انىقتايتىن بولسا، ءبىز قايداعى زايىرلى ەلمىز؟
الگى ۆيرۋس رەتىندە تاراعان ۆيدەودا “سانىمىز قانشا ەكەنىن كورسەتەيىك، مينيستر ءبىزدى قولداپ وتىر، تەك سانىمىزدىڭ كوپ ەكەنىن كورسەتسەك بولدى” دەپ اياقتايدى.
وسى داۋ قارساڭىندا تاعى ءبىر نارسەگە نازار اۋدارتقىم كەلەدى، جاڭا جاساقتالعان پارلامەنت قابىرعاسىندا حيدجابتى جاقتايتىن دەپۋتاتتار دا بار كورىنەدى. ونى الەۋمەتتىك جەلىدەگى پاراشاسىنان دا وپ-وڭاي انىقتاۋعا بولادى.
سونداي دەپۋتاتتاردىڭ ءبىرى - ايگۇل قۇسپان. ول مىسىرداعى بەيبارىس سۇلتان مەشىتىنىڭ اشىلۋىندا ۋاھابيتتىك-سالافيتتىك سارىنداعى قاپ-قارا حيدجابقا ورانىپ العانىن كورۋگە بولادى. ەرتەڭ “جاڭا قازاقستاننىڭ” وسىنداي دەپۋتاتتارى اتا زاڭدى ءدىني سارىندا جازىپ شىقپاسىنا كىم كەپىل؟ وندا ناق اۋعانستان، سيريانىڭ كەبىن كيەمىز. ال وسى ءدىني-راديكالدىق ويىندارعا مۇددەلى الپاۋىت ەلدەر “تىنىشتالدىرامىز” دەپ اسكەر كىرگىزىپ، جەرىمىزدى، جەر بايلىعىمىزدى تەگىن الاتىن بولادى.
ارمان اۋباكىر
