Oqý jyly qarsańynda hıdjab daýy órshıdi. Zań bar. Biraq solqyldaqtaý. Oqý-aǵartý mınıstrimiz sol zańdy aınalyp ótetin jol izdep jatqanǵa uqsaıdy.
Mınıstr onlaın jınalys ótkizip jatyr. Oǵan bir dinı azamat qatysyp otyr. Ol ataýly onlaın sharany qaıdan estip qatysyp otyr? Óıtkeni, ol jıyndy qarapaıym azamattar túgil jýrnalıster de bilgen joq. Jáne ádette bárin jiti qadaǵalaıtyn bılik organy álgi adamǵa óktem-óktem saýal qoıýǵa qalaı múmkindik berip qoıdy? Álgi kisi hıdjab máselesin ǵana kótermeıdi, mektepterde uldarǵa namaz oqıtyn oryndar daıyndaýdy da mınıstrge “qatal tapsyrady”. Biraq mınıstrimiz bul sózdi estimegen syńaı tanytady.
Men mınıstrdiń ornynda bolsam, “aınalaıyn, mektepte qaıdaǵy namaz oqıtyn oryn?” dep qarsy daýys kóterer edim. Joq, mınıstr tipti olaı etpeıdi. Bálkim, únsiz quptaıdy da. “Únsizdik - kelisý belgisi” dep orystar beker aıtpasa kerek.
Sonymen, mınıstr ne deıdi? “Barynsha máseleni sheshýge kúsh salyp jatyrmyz, ortaq bir kelisimge kelemiz dep úmittenemiz. Mýftııatpen osy másele týraly jıi-jıi kezdesip, aqyldasýdamyz. Maǵan hıdjab kıetin balalardyń tizimi kerek. Sony usynyńyzdar” deıdi. Zaıyrly memlekettiń bildeı Oqý-aǵartý mınıstri mýftııatpen aqyldasyp, hıdjab máselesin sheshetindeı ne basymyzǵa kún týdy? Mýftııat statýsy shyndap kelgende zań turǵysynan elimizdegi kóp uıymdarmen birdeı. Ekinshiden, mınıstr dinı mekememen aqyldasyp, baǵyt-baǵdaryn anyqtaıtyn bolsa, biz qaıdaǵy zaıyrly elmiz?
Álgi vırýs retinde taraǵan vıdeoda “sanymyz qansha ekenin kórseteıik, mınıstr bizdi qoldap otyr, tek sanymyzdyń kóp ekenin kórsetsek boldy” dep aıaqtaıdy.
Osy daý qarsańynda taǵy bir nársege nazar aýdartqym keledi, jańa jasaqtalǵan parlament qabyrǵasynda hıdjabty jaqtaıtyn depýtattar da bar kórinedi. Ony áleýmettik jelidegi parashasynan da op-ońaı anyqtaýǵa bolady.
Sondaı depýtattardyń biri - Aıgúl Quspan. Ol Mysyrdaǵy Beıbarys sultan meshitiniń ashylýynda ýahabıttik-salafıttik saryndaǵy qap-qara hıdjabqa oranyp alǵanyn kórýge bolady. Erteń “Jańa Qazaqstannyń” osyndaı depýtattary Ata zańdy dinı sarynda jazyp shyqpasyna kim kepil? Onda naq Aýǵanstan, Sırııanyń kebin kıemiz. Al osy dinı-radıkaldyq oıyndarǵa múddeli alpaýyt elder “tynyshtaldyramyz” dep ásker kirgizip, jerimizdi, jer baılyǵymyzdy tegin alatyn bolady.
Arman Áýbákir
