بۇگىن شىمكەنتتە «ۋاقىت سىناقتارى جانە وزگەرىستەردەگى جاستاردىڭ ءرولى. ەلدىك جانە حالىقارالىق جاستار ساياساتى» تاقىرىبىندا وڭىرلىك فورۋم وتۋدە. فورۋمعا قر اقپارات جانە قوعامدىق دامۋ ءمينيسترى د.ق.قىدىرالى، قالا اكىمى م. ايتەنوۆ ارنايى قاتىسىپ، ازاماتتىق قوعام بەلسەندىلەرىنىڭ ديالوگ الاڭىن اشىپ بەردى.
ازاماتتىق قوعامدى دامىتۋ مەن قالىپتاستىرۋ مەملەكەتتىك ساياساتتىڭ ماڭىزدى ستراتەگيالىق مىندەتتەرىنىڭ ءبىرى جانە دەموكراتيالىق، زايىرلى، قۇقىقتىق جانە الەۋمەتتىك مەملەكەت قۇرۋدىڭ ماڭىزدى شارتى بولىپ تابىلادى. بۇگىندە بۇل سەكتوردىڭ ءرولىن ارتتىرۋعا مەملەكەت باسشىسى قاسىم-جومارت توقاەۆ ۇلكەن ءمان بەرىپ وتىر.
پرەزيدەنت تاپسىرماسى اياسىندا قازىرگى تاڭدا، قالادا ازاماتتىق قوعام ينستيتۋتتارىنىڭ اتقاراتىن قىزمەت اياسى كەڭەيىپ كەلەدى. بۇگىندە قالا اۋماعىندا 550-دەن استام ۇكىمەتتىك ەمەس ۇيىمدار تىركەلىپ، جۇمىس جۇرگىزۋدە. اكىمدىك تاراپىنان ۇيىمداردىڭ دامۋىنا، ولاردىڭ قالىپتاسۋىنا تۇراقتى تۇردە قولداۋ كورسەتىلىپ كەلەدى.
“ازاماتتىق قوعام – بۇل قاراپايىم حالىق، ءبىز بەن ءسىز جانە قوعامدا وزىندىك ورنى بار ۇكىمەتتىك ەمەس ۇيىمدار. ال ۇكىمەتتىك ەمەس ۇيىمداردىڭ مەملەكەتتىڭ دامۋىندا ىقپالى وراسان زور. قازاقستان زايىرلى، وركەنيەتكە بەت العان مەملەكەت. سوندىقتان دا حالىقتىڭ ۇنىنە قۇلاق اسادى. جالپى بيلىك قاشان دا حالىقتىڭ ۇنىنە قۇلاق اسسا، وندا قوعامدا ءوزارا تۇسىنىستىك ورنايدى، باستى قۇندىلىعىمىز - ىنتىماق، بىرلىگىمىز ارتا تۇسەدى» - دەدى قالا اكىمى.
فورۋمنىڭ العاشقى بولىمىندە ساراپشى سپيكەرلەر ءسوز سويلەپ، بيلىكتىڭ ءوزارا سەرىكتەسى، قوعامنىڭ قوزعاۋشى كۇشىنە اينالعان ازاماتتىق قاۋىمداستىق وكىلدەرىنىڭ اتقارعان جۇمىستارىن تالقىلادى. اقپارات جانە قوعامدىق دامۋ ءمينيسترى سالانىڭ ۇزدىكتەرىن ارنايى ماراپاتتادى. فورۋمنىڭ ەكىنشى بولىمىندە ازاماتتىق قوعام بەلسەندىلەرىنىڭ ديالوگ الاڭىندا جاستار ساياساتى جانە كوشى-قون پروتسەستەرىنىڭ تەرىس سالدارىن جويۋ تەتىكتەرى، سىبايلاس جەمقورلىققا قارسى كۇرەس، پاتريوتيزم سەزىمىن نىعايتۋ تاقىرىپتارىندا جارىسسوزدەر وتەدى.
