بۇگىن شىمكەنت قالاسى اكىمدىگى جانىنداعى جاستار ساياساتى جونىندەگى كەڭەس وتىرىسىندا اتقارىلعان جۇمىستار مەن وزەكتى پروبلەمالار قارالدى. بۇگىندە ەلىمىزدىڭ جاستارىنا ۇلكەن قولداۋ كورسەتىپ وتىرعان پرەزيدەنت تاپسىرماسى شەڭبەرىندە قالادا وسى ساناتقا كىرەتىن ازاماتتاردىڭ جان-جاقتى دامۋىنا، ءبىلىم الۋىنا، كاسىپكەرلىكپەن اينالىسۋىنا ءتيىستى كومەكتەر كورسەتىلۋدە.
قازىر قالا اۋماعىندا بۇل ساناتقا كىرەتىن ازاماتتار سانى – 363 مىڭعا جەتتى. مەملەكەت باسشىسىنىڭ تاپسىرماسى بويىنشا ۇلتتىق جوبا اياسىندا بيىلدان باستاپ جاستارعا جەڭىلدىكپەن شاعىن نەسيە بەرۋ قولعا الىندى. ەندى 21 جاستان 35 جاسقا دەيىنگى جاستار 2,5 پايىزبەن 5 ميلليون تەڭگەگە دەيىن نەسيە الا الادى. وسى باعىتتا قالا بيۋدجەتىنەن 261 جاسقا شاعىن نەسيە بەرۋ جوسپاردا بار. بۇل – كاسىپكەرلىكپەن، تاۋار وندىرۋمەن، ساتۋمەن، قىزمەتتەر كورسەتۋمەن، ءونىم وندىرۋمەن اينالىسقىسى كەلەتىن جاستارعا بەرىلگەن ۇلكەن قولداۋ.
جاستاردى جۇمىسپەن قامتۋدا «جاستار پراكتيكاسى»، «العاشقى جۇمىس ورنى» جوبالارى دا ءوز ناتيجەسىن بەرۋدە. سونداي-اق كەڭەس وتىرىسىندا جاستار اراسىنداعى قىلمىس پەن قۇقىق بۇزۋشىلىق جانە ناشاقورلىقتىڭ الدىن الۋ شارالارى تالقىلاندى.
م.دۇيسەنبەكۇلى جاۋاپتىلارعا جاستاردى قولداۋ شارالارىن ساپالى، ناتيجەلى اتقارۋدى تاپسىردى. سونداي-اق نەسيە العان ازاماتتاردىڭ جوبالارىنا جان-جاقتى تالداۋ جۇرگىزىپ، باعىتتالعان قارجىنىڭ ماقساتتى ءارى ناتيجەلى يگەرىلگەنىنە تۇراقتى مونيتورينگ جاساۋدى ەسكەرتتى. سونىمەن قاتار جاستارعا ارنايى ايىنا ەكى رەت بوس جۇمىس ورىندارىنىڭ جارمەنكەسىن تۇراقتى تۇردە وتكىزۋ بويىنشا ناقتى تاپسىرمالار جۇكتەدى.
«قالانى اباتتاندىرۋدا، كورىكتەندىرۋدە بەلسەندى جاستاردىڭ كۇشىن پايدالانۋ ءتيىمدى بولادى. بىرلەسە جۇمىس ىستەۋ جاستار ءۇشىن ۇلكەن تاجىريبە. قاي ىستە دە ساپانى كوزدەۋىمىز كەرەك. بۇل رەتتە جاستاردى قولداۋداعى مەملەكەتتىك باعدارلامالاردىڭ ساپالى، ناتيجەلى ورىندالۋى ماڭىزدى. بۇگىندە قاي ساناتتاعى جاستارعا بولماسىن، مەملەكەتتىك قولداۋ جان-جاقتى قاراستىرىلعان.ەڭبەك ءوتىلى بولماعاندىقتان جۇمىسقا ورنالاسا الماي جۇرگەن جاستارعا ارنالعان ارنايى باعدارلامالار جاسالدى. كاسىپپەن اينالىسقىسى كەلەتىن جاستارعا دا ۇلكەن مۇمكىندىكتەر بار. جاس بۋىندى باسپانامەن قامتۋ شارالارى دا ناتيجەسىن بەرۋدە. ءتىپتى كەزىندە ءبىلىم الا الماي قالعان جاستارعا جان-جاقتى كومەكتەر كورسەتىلەدى. ءبىر سوزبەن ايتقاندا، جاس بۋىننىڭ بولاشاعىن قۇرۋعا بارلىق مۇمكىندىكتەر قاراستىرىلعان» - دەدى قالا اكىمى.
كەڭەستىڭ قورىتىندىسىندا ءتۇرلى سالاداعى وزات جاستار ارنايى ماراپاتتالىپ، سىي-قۇرمەتكە بولەندى. قالا اكىمى قوعامنىڭ قوزعاۋشى كۇشى – جاستاردى مەگاپوليستىڭ دامۋىنا اتسالىسۋعا، مەملەكەتتىك قولداۋلاردى ءتيىمدى پايدالانا وتىرىپ، جاڭاشا، تىڭ جوبالاردى جۇزەگە اسىرۋعا شاقىردى.
