Búgin Shymkent qalasy ákimdigi janyndaǵy jastar saıasaty jónindegi keńes otyrysynda atqarylǵan jumystar men ózekti problemalar qaraldy. Búginde elimizdiń jastaryna úlken qoldaý kórsetip otyrǵan Prezıdent tapsyrmasy sheńberinde qalada osy sanatqa kiretin azamattardyń jan-jaqty damýyna, bilim alýyna, kásipkerlikpen aınalysýyna tıisti kómekter kórsetilýde.
Qazir qala aýmaǵynda bul sanatqa kiretin azamattar sany – 363 myńǵa jetti. Memleket basshysynyń tapsyrmasy boıynsha ulttyq joba aıasynda bıyldan bastap jastarǵa jeńildikpen shaǵyn nesıe berý qolǵa alyndy. Endi 21 jastan 35 jasqa deıingi jastar 2,5 paıyzben 5 mıllıon teńgege deıin nesıe ala alady. Osy baǵytta qala bıýdjetinen 261 jasqa shaǵyn nesıe berý josparda bar. Bul – kásipkerlikpen, taýar óndirýmen, satýmen, qyzmetter kórsetýmen, ónim óndirýmen aınalysqysy keletin jastarǵa berilgen úlken qoldaý.
Jastardy jumyspen qamtýda «Jastar praktıkasy», «Alǵashqy jumys orny» jobalary da óz nátıjesin berýde. Sondaı-aq keńes otyrysynda jastar arasyndaǵy qylmys pen quqyq buzýshylyq jáne nashaqorlyqtyń aldyn alý sharalary talqylandy.
M.Dúısenbekuly jaýaptylarǵa jastardy qoldaý sharalaryn sapaly, nátıjeli atqarýdy tapsyrdy. Sondaı-aq nesıe alǵan azamattardyń jobalaryna jan-jaqty taldaý júrgizip, baǵyttalǵan qarjynyń maqsatty ári nátıjeli ıgerilgenine turaqty monıtorıng jasaýdy eskertti. Sonymen qatar jastarǵa arnaıy aıyna eki ret bos jumys oryndarynyń jármenkesin turaqty túrde ótkizý boıynsha naqty tapsyrmalar júktedi.
«Qalany abattandyrýda, kóriktendirýde belsendi jastardyń kúshin paıdalaný tıimdi bolady. Birlese jumys isteý jastar úshin úlken tájirıbe. Qaı iste de sapany kózdeýimiz kerek. Bul rette jastardy qoldaýdaǵy memlekettik baǵdarlamalardyń sapaly, nátıjeli oryndalýy mańyzdy. Búginde qaı sanattaǵy jastarǵa bolmasyn, memlekettik qoldaý jan-jaqty qarastyrylǵan.Eńbek ótili bolmaǵandyqtan jumysqa ornalasa almaı júrgen jastarǵa arnalǵan arnaıy baǵdarlamalar jasaldy. Kásippen aınalysqysy keletin jastarǵa da úlken múmkindikter bar. Jas býyndy baspanamen qamtý sharalary da nátıjesin berýde. Tipti kezinde bilim ala almaı qalǵan jastarǵa jan-jaqty kómekter kórsetiledi. Bir sózben aıtqanda, jas býynnyń bolashaǵyn qurýǵa barlyq múmkindikter qarastyrylǵan» - dedi qala ákimi.
Keńestiń qorytyndysynda túrli saladaǵy ozat jastar arnaıy marapattalyp, syı-qurmetke bólendi. Qala ákimi qoǵamnyń qozǵaýshy kúshi – jastardy megapolıstiń damýyna atsalysýǵa, memlekettik qoldaýlardy tıimdi paıdalana otyryp, jańasha, tyń jobalardy júzege asyrýǵa shaqyrdy.
