الماتى تەلەارناسىنىڭ ءجۋرناليسى مەن تەلەوپەراتورىنا ازاماتتىق بەلسەندى دەنە جاراقاتىن سالىپ، ءشتاتيۆتى سىندىرعان، دەپ حابارلايدى ء“ادىرنا”تىلشىسى Qaz365.kz- كە سىلتەپ.
"الماتى" ارناسىنىڭ مالىمدەۋىنشە قىزمەتكەرلەرىنە ءبىر ازامات شابۋىل جاساعان. كىنالى ازاماتقا زاڭ شەڭبەرىندە شارا قولدانىلۋىن تالاپ ەتىپ وتىر.
“الماتى” ارناسىنىڭ ءتۇسىرىلىم توبى 14 تامىز كۇنى ادەتتەگىدەي كاسىبي مىندەتتەرىن اتقارعان. الايدا باق وكىلدەرىنە شابۋىل جاسالعان. “الماتى” تەلەارناسىنىڭ ۇجىمى:
“قۇرمەتتى دوستار! بۇگىن الاڭداتارلىق ءبىر جاعداي بولدى. قاڭتار وقيعاسى كەزىندە قازا تاپقان 4 جاستاعى ايكوركەم مەلدەحاننىڭ ولىمىنە قاتىستى الماتى گارنيزونىنىڭ اسكەري سوتى ماڭىندا ءبىزدىڭ ارىپتەستەرىمىزگە ازاماتتىق بەلسەندى بەليالوۆ بايباح كۇش كورسەتتى. ەش سەبەپسىز ءتۇسىرىلىم توبىنا تاپ بەرگەن ازامات جۋرناليست پەن تەلەوپەراتورعا دەنە جاراقاتىن سالىپ، بەينەكامەرا ءشتاتيۆىن سىندىرعان. ونىمەن قويماي ارىپتەستەرىمىزگە بۇدان كەيىن دە قانداي دا ءبىر ارەكەت جاسايتىنىن ايتىپ، قورقىتقان، بوقاۋىز ءسوز ايتقان.
ءبىز ايكوركەم مەلدەحاننىڭ قازاسىنا قايعىرامىز، بىراق بۇل وقيعاعا دا بەيجاي قاراي المايمىز. سونىمەن قاتار باق وكىلدەرىنە كۇش كورسەتۋدى تارتىپسىزدىك ءھام زاڭعا قايشى ارەكەت دەپ سانايتىنىمىزدى جەتكىزگىمىز كەلەدى. وسى تۇستا كىنالى ازاماتقا زاڭ شەڭبەرىندە شارا قولدانىلۋىن تالاپ ەتەمىز”، - دەلىنگەن مالىمدەمەدە.
تەلەارنا ۇجىمى باس پروكۋراتۋرا مەن ىشكى ىستەر مينيسترلىگىنەن، قر اقپارات جانە قوعامدىق دامۋ مينيسترلىگىنەن قىزمەتكەرلەردىڭ جەكە قاۋىپسىزدىگىن قامتاماسىز ەتۋدى سۇرايدى.
سوڭعى جىلدارى باق وكىلدەرىنە جاسالاتىن شابۋىل كوبەيگەن. 2022 جىلعى ستاتيستيكاعا سۇيەنسەك، الەم بويىنشا 67 جۋرناليست كىسى قولىنان قازا تاپقان.
