موڭعوليا استاناسى ۇلان-باتىردىڭ ماڭىندا ايۋ ەر ادامدى ولتىرگەن، دەپ حابارلايدى “ادىرنا” ۆزگلياد-قا سىلتەپ.
جىرتقىشتى ىزدەۋ جۇمىستارى شامامەن 20 ساعاتقا سوزىلعان.
مالىمەتكە سايكەس، ايۋدى ىزدەۋگە توتەنشە جاعدايلار قىزمەتىنىڭ ماماندارى مەن ەرىكتىلەردەن قۇرالعان 47 ادام قاتىستى. ىزدەستىرۋ توبى التى توپقا ءبولىنىپ، تۇزاقتار مەن جىلۋ كامەراسىمەن جابدىقتالعان ۇشقىشسىز ۇشۋ اپپاراتتارىن پايدالانعان.
ناتيجەسىندە جۇماعا قاراعان ءتۇنى شامامەن التى جاستاعى اتالىق ايۋ قولعا ءتۇستى. جانۋار قاۋىپسىز جەرگە جەتكىزىلگەن. ماماندار ونىڭ ادامعا شابۋىل جاساۋ وقيعاسىنا قاتىسى بار-جوعىن انىقتايدى.
وقيعا 8 قازانعا قاراعان ءتۇنى ۇلان-باتىردىڭ ءبايانزۇرح اۋدانىنداعى جايىلىمدىق اۋماقتا بولعان. الدىن الا مالىمەت بويىنشا، ايۋ قورشاۋى جوق جازعى ءۇيدى قيراتىپ، سول جەردە بولعان ەر ادام مەن ايەلگە شابۋىل جاساعان. ايەل اۋىر جاراقات العان.
موڭعوليا استاناسىنىڭ قورشاعان ورتانى قورعاۋ دەپارتامەنتىنىڭ مالىمەتىنشە، جىل باسىنان بەرى ۇلان-باتىردىڭ شەت ايماقتارىندا جىرتقىشتاردىڭ پايدا بولۋىنا قاتىستى 24 حابارلاما تىركەلگەن. ال ەل بويىنشا تۇرعىندار ايۋلاردىڭ ەلدى مەكەندەرگە كىرۋىنە بايلانىستى 754 رەت حابارلاسقان. مۇنداي جاعدايلاردىڭ 80 پايىزىندا ايۋلار قونجىقتارىمەن بىرگە جۇرگەن.
