مەملەكەت باسشىسى الماتى اكىمى ەربولات دوساەۆتى قابىلدادى. پرەزيدەنتكە الماتىنىڭ الەۋمەتتىك-ەكونوميكالىق دامۋى تۋرالى باياندالدى، دەپ حابارلايدى “ادىرنا” ۇلتتىق پورتالى “اقوردا” سايتىنا سىلتەپ.
پرەزيدەنتكە بيىلعى ەكى ايدىڭ قورىتىندىسى بويىنشا قالا ەكونوميكاسىنىڭ قارقىندى وسكەنى، الماتىنىڭ قىسقا مەرزىمدى ەكونوميكالىق ينديكاتورىنىڭ ءوسىمى 1,7 پايىزعا جەتكەنى جونىندە ايتىلدى. جەرگىلىكتى بيۋدجەتكە تۇسكەن قارجى 55 پايىزعا، ياعني 287,5 ميلليارد تەڭگەگە دەيىن كوبەيدى. نەگىزگى كاپيتالعا سالىنعان ينۆەستيتسيا كولەمى ارتىپ كەلەدى. 190 ميلليارد تەڭگە ينۆەستيتسيا تارتىلىپ، ءوسىم كورسەتكىشى 24,5 پايىزدى قۇرادى.
ەربولات دوساەۆتىڭ ايتۋىنشا، بىلتىر تامىز ايىندا مەملەكەت باسشىسىنىڭ بەرگەن تاپسىرمالارىن ورىنداۋ اياسىندا مەگاپوليستى پوليورتالىق رەتىندە دامىتۋ، تۇرعىن ءۇي مەن الەۋمەتتىك نىسانداردىڭ سەيسميكالىق قاۋىپسىزدىگىن كۇشەيتۋ، قۇرىلىستاردىڭ تىعىز سالىنۋىن بولدىرماۋ جانە باسقا دا ماسەلەلەر بويىنشا جاڭا تالاپتاردى ەنگىزۋ جونىندەگى كەشەندى شارالار جۇزەگە اسىرىلىپ جاتىر.
قاسىم-جومارت توقاەۆقا قالانىڭ سەيسميكالىق قاۋىپسىزدىگىن قامتاماسىز ەتۋ جونىندەگى تاپسىرماسىنىڭ ورىندالۋى جايىندا مالىمەت بەرىلدى. تۇرعىندار مەن زاڭدى تۇلعالاردىڭ وتىنىشتەرى بويىنشا بيىل 23 قاڭتارداعى جەر سىلكىنىسىنەن كەيىن تەكسەرىلگەن 183 نىسانعا ايتارلىقتاي زاقىم كەلمەگەن. سونداي-اق 4 ناۋرىزداعى جەر سىلكىنىسىنەن كەيىن تۇسكەن وتىنىشتەر بويىنشا 363 نىسانعا كەشەندى تەكسەرۋ جۇمىستارى باستالدى. 2024 جىلى 13,2 مىڭ نىسانعا سەيسمواۋديت جۇرگىزىلەدى. مەملەكەت باسشىسىنىڭ تاپسىرماسىمەن توتەنشە جاعداي كەزىندە ازاماتتاردى ۋاقىتىلى قۇلاقتاندىرۋ ماقساتىندا بيىل 1 ماۋسىمعا دەيىن پيلوتتىق رەجيمدە «Mass Alert» جۇيەسى ەنگىزىلەدى.
بۇدان بولەك، قالا اكىمى قالدىقتاردى باسقارۋ جۇيەسىن جاڭعىرتۋ، اۋلالاردىڭ اۋماقتارى مەن جاسىل جەلەكتەردى كۇتىپ ۇستاۋدىڭ جاڭا ءارى كەشەندى ءتاسىلى تۋرالى ايتتى. وسى رەتتە قىزمەت كورسەتەتىن ۇيىمدارمەن 3 جىلعا سەرۆيستىك كەلىسىم-شارتقا قول قويىلدى. بۇل شارالار ولاردىڭ قارجىلىق ورنىقتىلىعىن جانە كورسەتىلەتىن قىزمەتتەردىڭ ساپاسىن ارتتىرادى.
كەزدەسۋ سوڭىندا قاسىم-جومارت توقاەۆ ەكونوميكانى ودان ءارى ءارتاراپتاندىرۋ، الماتىنىڭ سەيسميكالىق قاۋىپسىزدىگىن قامتاماسىز ەتۋ، سۋمەن قامتۋ جانە سۋ تارتۋ جۇيەسىن جاڭعىرتۋ جۇمىستارىن جالعاستىرۋدى تاپسىردى.
