BAQ-qa tóngen qaýip. Almatyda jýrnalıst pen operator soqqyǵa jyǵyldy

1401
Adyrna.kz Telegram

Almaty telearnasynyń jýrnalısi men teleoperatoryna azamattyq belsendi dene jaraqatyn salyp, shtatıvti syndyrǵan, dep habarlaıdy “Adyrna”tilshisi Qaz365.kz- ke siltep.

"Almaty" arnasynyń málimdeýinshe qyzmetkerlerine bir azamat shabýyl jasaǵan. Kináli azamatqa zań sheńberinde shara qoldanylýyn talap etip otyr.

“Almaty” arnasynyń túsirilim toby 14 tamyz kúni ádettegideı kásibı mindetterin atqarǵan. Alaıda BAQ ókilderine shabýyl jasalǵan.  “Almaty” telearnasynyń ujymy:

“Qurmetti dostar! Búgin alańdatarlyq bir jaǵdaı boldy. Qańtar oqıǵasy kezinde qaza tapqan 4 jastaǵy Aıkórkem Meldehannyń ólimine qatysty Almaty garnızonynyń áskerı soty mańynda bizdiń áriptesterimizge azamattyq belsendi Belıalov Baıbah kúsh kórsetti. Esh sebepsiz túsirilim tobyna tap bergen azamat jýrnalıst pen teleoperatorǵa dene jaraqatyn salyp, beınekamera shtatıvin syndyrǵan. Onymen qoımaı áriptesterimizge budan keıin de qandaı da bir áreket jasaıtynyn aıtyp, qorqytqan, boqaýyz sóz aıtqan.
Biz Aıkórkem Meldehannyń qazasyna qaıǵyramyz, biraq bul oqıǵaǵa da beıjaı qaraı almaımyz. Sonymen qatar BAQ ókilderine kúsh kórsetýdi tártipsizdik hám zańǵa qaıshy áreket dep sanaıtynymyzdy jetkizgimiz keledi. Osy tusta kináli azamatqa zań sheńberinde shara qoldanylýyn talap etemiz”, - delingen málimdemede.

Telearna ujymy  Bas prokýratýra men Ishki ister mınıstrliginen, QR Aqparat jáne qoǵamdyq damý mınıstrliginen qyzmetkerlerdiń jeke qaýipsizdigin qamtamasyz etýdi suraıdy.

Sońǵy jyldary BAQ ókilderine jasalatyn shabýyl kóbeıgen. 2022 jylǵy statıstıkaǵa súıensek, álem boıynsha 67 jýrnalıst kisi qolynan qaza tapqan.

Pikirler