جەتىسايداعى سۇمدىق وقيعادان سوڭ شەنەۋنىكتەر دە جاپپاي جازالانىپ جاتىر

28 جاستاعى ايەل قازىر ۋاقىتشا قاماۋ اباقتىسىندا. ءتىپتى، قىزدارىنىڭ وسىعان دەيىنگى جاعدايىن بىلمەدىم دەپ اقتالعان اكەسىنە دە قاتىستى “كامەلەتكە تولماعانداردى تاربيەلەۋ مىندەتىن ورىنداماعانى” ءۇشىن تەرگەۋ جۇرگىزىلىپ جاتىر. سونداي-اق، اۋدانداعى سەلقوستىق تانىتقان جاۋاپتى قىزمەتكەرلەر دە جازاسىز قالمايدى. “جالپى، جاعا ۇستاتارلىق بۇل جاعدايعا سەلقوستىق سەبەپ بولىپ وتىر. سوندىقتان، مەكتەپ مۇعالىمدەرىنەن باستاپ، ديرەكتورى بار، ءبىلىم ءبولىمى باسشىسى مەن اۋدان اكىمىنىڭ ورىنباسارىنىڭ ماسەلەسى ماي شاممەن قارالاتىن بولادى. قازىر، بۇل ماسەلە ومبۋدسمەن، ءبىلىم ءمينيسترى مەن باس پروكۋروردىڭ جەكە باقىلاۋىندا”، – دەيدى ءبىلىم جانە عىلىم ءمينيسترىنىڭ كەڭەسشىسى رايسا شەر. اۋدان اكىمىنىڭ ورىنباسارى، مەكتەپ ديرەكتورى مەن ورىنباسارى، ءۇش قىز وقىعان سىنىپتاردىڭ جەتەكشىلەرى تارتىپتىك جازاعا تارتىلدى. جۇلدىز كوبەەۆا ءۇش جىل بۇرىن اكەسىمەن ازاماتتىق نەكەگە تۇرىپ، كەيىن ۇل تۋعان سوڭ، وگەي قىزدارىنا اڭگىر تاياق ويناتۋدى باستاپتى. جابىرلەنۋشىلەردىڭ ايتۋىنشا، ءتۇرلى تاپسىرمالار بەرىپ، قيت ەتسە ۇرىپ-سوعىپ، ءتىپتى تىرناقتىڭ استىنا ينە تىعۋدان تايىنباعان. مۇزداي سۋعا سالىپ قيناپ، مۇزداتقىشتىڭ ىشىنە دە قاماپ جابىرلەپ كەلىپتى. ەكى جىلعا جۋىق ازاپتالعان قىزداردىڭ ءبىرى وگەي شەشەنىڭ وزبىرلىعىن سىنىپ جەتەكشىسىنە ايتىپ بەرگەن سوڭ عانا قۇزىرلى ورىندار ارەكەت ەتە باستادى. قازىر، 11, 13 جانە 14 جاستاعى ءۇش جەتكىنشەكپەن پسيحولوگتار جۇمىس ىستەپ جاتىر.