Jetisaıdaǵy sumdyq oqıǵadan soń sheneýnikter de jappaı jazalanyp jatyr

28 jastaǵy áıel qazir ýaqytsha qamaý abaqtysynda. Tipti, qyzdarynyń osyǵan deıingi jaǵdaıyn bilmedim dep aqtalǵan ákesine de qatysty “kámeletke tolmaǵandardy tárbıeleý mindetin oryndamaǵany” úshin tergeý júrgizilip jatyr. Sondaı-aq, aýdandaǵy selqostyq tanytqan jaýapty qyzmetkerler de jazasyz qalmaıdy. “Jalpy, jaǵa ustatarlyq bul jaǵdaıǵa selqostyq sebep bolyp otyr. Sondyqtan, mektep muǵalimderinen bastap, dırektory bar, bilim bólimi basshysy men aýdan ákiminiń orynbasarynyń máselesi maı shammen qaralatyn bolady. Qazir, bul másele ombýdsmen, bilim mınıstri men bas prokýrordyń jeke baqylaýynda”, – deıdi Bilim jáne ǵylym mınıstriniń keńesshisi Raısa Sher. Aýdan ákiminiń orynbasary, mektep dırektory men orynbasary, úsh qyz oqyǵan synyptardyń jetekshileri tártiptik jazaǵa tartyldy. Juldyz Kóbeeva úsh jyl buryn ákesimen azamattyq nekege turyp, keıin ul týǵan soń, ógeı qyzdaryna áńgir taıaq oınatýdy bastapty. Jábirlenýshilerdiń aıtýynsha, túrli tapsyrmalar berip, qıt etse uryp-soǵyp, tipti tyrnaqtyń astyna ıne tyǵýdan taıynbaǵan. Muzdaı sýǵa salyp qınap, muzdatqyshtyń ishine de qamap jábirlep kelipti. Eki jylǵa jýyq azaptalǵan qyzdardyń biri ógeı shesheniń ozbyrlyǵyn synyp jetekshisine aıtyp bergen soń ǵana quzyrly oryndar áreket ete bastady. Qazir, 11, 13 jáne 14 jastaǵy úsh jetkinshekpen psıhologtar jumys istep jatyr.