8 تامىزدا ءوتىپ جاتقان ۇكىمەت وتىرىسىندا قاراعاندى وبلىسىنداعى بالالاردىڭ جاپپاي ۋلانۋ جاعدايى دا ءسوز بولدى. جيىندا دەنساۋلىق ساقتاۋ ءمينيسترى اجار عينيات قاراعاندىداعى بالالاردىڭ ۋلى زاتتان قاتتى ۋلانعانىن ايتتى، دەپ حابارلايدى "ادىرنا" ۇلتتىق پورتالى.
قازىر قاراعاندى وبلىسىنىڭ ارناۋلى الەۋمەتتىك قىزمەت كورسەتۋ ورتالىعى اۋرۋحاناسىنا تۇسكەن 14 بالانىڭ جەتەۋى ساۋىققان. ولار اۋرۋحانادان شىعارىلدى. 4 بالانىڭ جاعدايى ءالى دە اۋىر.
دارىگەرلەر بالالار تاماقتان ۋلانباعانىن جانە ولاردىڭ بويىندا ينفەكتسيالىق اۋرۋلاردىڭ جوق ەكەندىگىن ناقتىلادى.
مينيستر بالالاردىڭ جاپپاي ۋلانۋىنا قاتىستى بىلاي دەدى:
"الدىن الا ەپيدەميولوگيالىق تەكسەرۋ، زەرتحانا زەرتتەۋلەرىنىڭ ناتيجەسى اۋرۋدىڭ دامۋ سيپاتى تاماقتان بولماعانىن جانە بالالاردا ينفەكتسيالىق اۋرۋلاردىڭ جوقتىعىن كورسەتتى. بۇل جاعدايدىڭ بولۋ سەبەبىن دارىگەر ماماندار گەنەزيسى بەلگىسىز ۋلى زاتتان قاتتى ۋلانۋ دەپ پايىمدايدى. قازىر سوت مەديتسينالىق ساراپتاما جۇرگىزىلىپ جاتىر. بالالاردىڭ جاعدايى ەرەكشە باقىلاۋدا".پرەمەر-مينيستر ءاليحان سمايىلوۆ دەنساۋلىق ساقتاۋ مينيسترىنە تاپسىرما بەردى. بالالاردى بارلىق قاجەت دارىگەرلىك كومەكپەن قامتاماسىز ەتىپ، اۋرۋحانادان شىققاننان كەيىن دە باقىلاۋدا ۇستاۋىن تاپسىردى.
"ادىرنا" ۇلتتىق پورتالى
ۇقساس جاڭالىقتار
