سۋ قويماسىنىڭ جانىندا سەنبىلىك ءوتتى

ەلوردالىق قحا مەن ۇكىمەتتىك ەمەس ۇيىمدار سۋ قويماسىنىڭ جاعالاۋىندا سەنبىلىك وتكىزدى، دەپ حابارلايدى “ادىرنا”.  استانا قالاسى قازاقستان حالقى اسسامبلەياسى مەن ۇكىمەتتىك ەمەس ۇيىمدار بىرلەسىپ سۋ قويماسىنىڭ جاعالاۋىندا تازالىق سەنبىلىگىن وتكىزدى، دەپ حابارلادى ەلوردا اكىمدىگىنىڭ رەسمي سايتى. اتالعان ءىس-شاراعا «Lider»، «اسار – سارىارقا» جانە «جاقسىلىق اريفمەتيكاسى» قوعامدىق بىرلەستىكتەرىنىڭ مۇشەلەرى بەلسەنە اتسالىستى. ەرىكتىلەر قولدارىنا كۇرەك-تىرمالارى مەن قاپتارىن الىپ، سۋ قويماسىنىڭ جاعالاۋىن بويلاي ءجۇرىپ، اياق استىندا جاتقان ءارتۇرلى قوقىستاردى جيناستىردى. «ءوزارا اقىلداسىپ، كەڭەسە كەلە ەكولوگيالىق اۋماقتاردىڭ ىشىنەن وسى جەردى تاڭدادىق. ءوزىمىز سۋ ءىشىپ وتىرعان سۋ قويماسىنىڭ اينالاسى ايناداي تازا بولعانىن قالايمىز»، – دەدى «جاقسىلىق اريفمەتيكاسى» قوعامدىق بىرلەستىگىنىڭ جەتەكشىسى ۇلجان مىرزاگەلديەۆا. ونىڭ ايتۋىنشا، مۇنداي سەنبىلىكتەرگە كوكتەم ماۋسىمىنان باستاپ اتسالىسىپ كەلەدى. «اسار – سارىارقا» قوعامدىق بىرلەستىگىنىڭ مۇشەسى گۋزەل بەردەش تە جىلىنا ءبىر رەت بولسا دا تازالىق اكتسيالارىنا قاتىسىپ تۇراتىندىقتارىن ايتتى. ال سۋ قويماسىنىڭ ماڭىنىڭ اينالاسى ايتارلىقتاي تازا بولۋىنا جەرگىلىكتى تۇرعىندار دا ۇلەس قوسىپ كەلەدى ەكەن. ولار دەمالۋعا كەلگەندەردىڭ كەيبىرى وتىرعان ورنىن تازالاماي كەتىپ جاتاتىنىنا رەنىشىن ءبىلدىردى. سەنبىلىككە قاتىسۋشىلار استانالىق سۋ قويماسىنىڭ ماڭىندا 2-3 ساعات تازالىق جۇمىسىن جۇرگىزىپ، بىرنەشە قاپ قوقىس جيناپ، اينالانى مۇنتازداي ەتتى.