قاراعاندى وبلىسىندا قايتادان بالالار ۋلاندى. وبلىستاعى ارناۋلى الەۋمەتتىك قىزمەت كورسەتۋ ورتالىعىندا بالالاردىڭ جاپپاي ۋلانۋ دەرەگى تىركەلدى. ۋلانۋ كەسىرىنەن ءبىر بالا كوز جۇمدى، 6 بالا جانساقتاۋ بولىمىندە جاتىر، دەپ حابارلايدى "ادىرنا" ۇلتتىق پورتالى.
بالالار 30 شىلدە كۇنى ءوزىن ناشار سەزىنگەن. الدىمەن ورتالىقتاعى ەكى بالا السىرەپ، دەنساۋلىعىنا شاعىم ايتقان. قۇسىپ، ءىشى وتكەن. 31 شىلدە كۇنى وسى مەكەمەدەگى تاعى 10 بالادان ۇقساس بەلگىلەرى بار دەرت انىقتالىپ، اۋرۋحاناعا جاتقىزىلدى.
«دارىگەرلەر جەدەل شارالار قولدانعانىنا قاراماستان بالالاردىڭ ءبىرى قايتىس بولدى. بۇگىنگى تاڭدا التى بالا رەانيماتسيادا. قالعاندارى دارىگەرلەردىڭ باقىلاۋىندا»، - دەپ مالىمدەدى قاراعاندى وبلىسى اكىمىنىڭ ءباسپاسوز قىزمەتى.اۋرۋحاناعا وبلىس اكىمى ەرماعانبەت بولەكپاەۆ بارعان. ونىڭ وبلىستىق دەنساۋلىق ساقتاۋ باسقارماسىنىڭ باسشىلىعىمەن جانە ەمدەۋشى دارىگەرلەرمەن جەدەل كەڭەس وتكىزگەنى ايتىلادى. وقيعانىڭ سەبەپتەرىن انىقتاۋ ءۇشىن ارنايى كوميسسيا قۇرىلدى. قىلمىستىق ءىس قوزعالىپ، جاعداي قاراعاندى وبلىسىنىڭ ارنايى پروكۋرورلار باسقارماسىنا بەرىلدى. ەرماعانبەت بولەكپاەۆ تەرگەۋ ناتيجەسىندە جاۋاپتى تۇلعالار انىقتالىپ، قاتاڭ جازالاناتىنىن اتاپ ءوتتى. مەكەمە ديرەكتورىنىڭ مىندەتىن اتقارۋشى مامان قىزمەتىنەن شەتتەتىلدى. قاراعاندى وبلىسى بالا ۋلانۋ دەرەگى بويىنشا سوڭعى كەزدەرى ءجيى باق بەتىنەن تۇسپەيتىن بولدى. ەستەرىڭىزدە بولسا، قاراعاندىداعى بالاباقشادا بالالار شاينەكتىڭ قاعىن تازالايتىن سۋدان ۋلانىپ قالعانى حابارلاعان ەدىك.
"ادىرنا" ۇلتتىق پورتالى
ۇقساس جاڭالىقتار
