قاراعاندى اۋەجايى اۋقىمدى جاڭعىرتۋ كەزەڭىنە قادام باستى: الداعى 25 جىلعا ارنالعان دامۋ ماستەر-جوسپارى ازىرلەندى. قۇجاتتى حالىقارالىق ساراپشىلار دايىنداعان. نەگىزگى باسىمدىق — مۋلتيمودالدى اۋە حابىن قالىپتاستىرىپ، ونىڭ اينالاسىندا ءىرى جۇك ەكوجۇيەسى — QarGoCity جوباسىن ىسكە قوسۋ. باستاماعا مەملەكەت پەن جەرگىلىكتى بيلىك قولداۋ ءبىلدىرىپ وتىر.
جوبانىڭ كەلەشەگى وبلىس اكىمدىگىندە وتكەن كەڭەستە تالقىلاندى.
— مەملەكەت باسشىسى ەلدىڭ ترانزيتتىك الەۋەتىن دامىتۋ، ەكونوميكانى ءارتاراپتاندىرۋ جانە جاڭا ءوسىم نۇكتەلەرىن قالىپتاستىرۋدىڭ ماڭىزىن بىرنەشە رەت اتاپ ءوتتى. ءبىزدىڭ ءوڭىر ءۇشىن مۇنداي درايۆەر سارى-اركا اۋەجايى بولۋى ءتيىس. بۇل اۋەجاي حالىقارالىق جۇك اۋە تاسىمالدارىن دامىتۋعا تولىق مۇمكىندىك بەرەدى: مۇندا ەلىمىزدەگى اۋماعى بويىنشا ەكىنشى ءىرى كارگو-تەرمينال ورنالاسقان، سونداي-اق لاتىن امەريكاسى، ەۋروپا جانە وڭتۇستىك-شىعىس ازيامەن جۇك باعىتتارى جولعا قويىلعان. كەلەسى كەزەڭ — قولدانىستاعى ينفراقۇرىلىمنان حالىقارالىق دەڭگەيدەگى مۋلتيمودالدى اۋە حابىنا كوشۋ، — دەدى وبلىس اكىمى ەرماعانبەت بولەكپاەۆ.
قازىر «سارىارقا» ارنايى ەكونوميكالىق ايماعى اياسىندا لوگيستيكا، قايتا وڭدەۋ جانە جۇك اعىندارىنا قىزمەت كورسەتۋ باعىتتارىن دامىتۋعا ارنالعان مامانداندىرىلعان سۋبايماق قۇرۋ پىسىقتالۋدا. ينۆەستورلار مەن جاڭا وندىرىستەردى تارتۋعا نەگىز بولاتىن جەتى باسىم باعىت ايقىندالعان. سونىمەن قاتار اۋەجايعا تىكەلەي تەمىرجول تارماعىن سالۋ ماسەلەسى قاراستىرىلىپ جاتىر.
«سارى-اركا اۋەجايى» اق ديرەكتورلار كەڭەسىنىڭ توراعاسى ەرلان وسپانوۆ ءمالىم ەتكەندەي، جوبا جوسپار دەڭگەيىنەن ناقتى ىسكە اسىرۋ كەزەڭىنە ءوتىپ كەلەدى. قاراعاندىدا شامامەن 600 گەكتار اۋماقتى قامتيتىن جاڭا كارگو-ايماق سالىنۋدا، اەرودروم ينفراقۇرىلىمى كەڭەيتىلىپ، ءىرى جۇك ۇشاقتارىن قابىلداۋعا ارنالعان الاڭدار دايىندالۋدا.
سونداي-اق وتىن بازاسى دا دامىپ كەلەدى — اۋەجاي ەلدەگى ەكى ءتۇرلى اۆياوتىن ءتۇرى بار ساناۋلى نىسانداردىڭ بىرىنە اينالماق.
جۇك تاسىمالىنىڭ كولەمى دە ارتىپ كەلەدى. بۇعان دەيىن قاراعاندى جىلىنا شامامەن 15 مىڭ توننا جۇك قابىلداسا، بيىل بۇل كورسەتكىشتى 100 مىڭ تونناعا جەتكىزۋ جوسپارلانىپ وتىر.
ال الداعى جوسپارلار بۇدان دا اۋقىمدى. باسقارۋشى سەرىكتەس فرانتس ۆان گەسسەننىڭ باعالاۋىنشا، الداعى ون جىل ىشىندە جۇك كولەمى جىلىنا 1 ميلليون تونناعا دەيىن ءوسۋى مۇمكىن.
— قاراعاندى ءىرى جۇك حابىن دامىتۋ ءۇشىن بىرەگەي مۇمكىندىكتەرگە يە: ءتيىمدى گەوگرافيالىق ورنالاسۋ، قولجەتىمدى جەر رەسۋرستارى، اۋە كەڭىستىگىنىڭ بوس بولۋى، سونداي-اق جولاۋشىلار اعىنىمەن باسەكەلەسپەي، ارنايى جۇك ينفراقۇرىلىمىن دامىتۋعا جاعداي بار. ءبىز اۋەجاي مەن وعان ىرگەلەس اۋماقتى دامىتۋدىڭ كەشەندى ماستەر-جوسپارىن ازىرلەدىك. بۇل تەك اۋەجايدى كەڭەيتۋ جوباسى ەمەس، سونىمەن قاتار QarGoCity لوگيستيكالىق جانە يندۋستريالىق ەكوجۇيەسىن قالىپتاستىرۋدىڭ نەگىزى. وسىلايشا، قاراعاندى ەۋرازيانىڭ لوگيستيكالىق ورتالىعىنا اينالا الادى، — دەپ تۇيىندەدى فرانتس ۆان گەسسەن.
