قاراعاندى وبلىسىنىڭ ىشكى ساياسات باسقارماسى بالقاش قالاسى پروكۋراتۋراسىنىڭ قولداۋىمەن «BALKHASH TOUR FEST» فەستيۆالى اياسىندا قۇقىقتىق كۆەست ۇيىمداستىردى. شارانىڭ باستى ماقساتى – جاستاردىڭ قۇقىقتىق ساۋاتتىلىعىن ارتتىرۋ جانە «زاڭ مەن ءتارتىپ» قاعيداتىن ناسيحاتتاۋ.
شارا قالانىڭ بەلسەندى جاستارى مەن فەستيۆال قوناقتارىنىڭ باسىن قوستى. قاتىسۋشىلار ينتەراكتيۆتى فورماتتا زاڭناما بويىنشا بىلىمدەرىن سىناپ، جاڭا داعدىلار يگەردى جانە قۇقىقتىق مادەنيەتىن شىڭداۋعا مۇمكىندىك الدى.
كۆەست اياسىندا پروكۋراتۋرا، پوليتسيا جانە توتەنشە جاعدايلار باسقارماسى وكىلدەرىنىڭ قاتىسۋىمەن ارنايى تاقىرىپتىق ستانتسيالار قۇرىلدى. ءار لوكاتسيادا قاتىسۋشىلار قۇقىقتىق ساۋاتتىلىق، قاۋىپسىزدىك، الاياقتىققا قارسى ءىس-قيمىل، قۇقىق بۇزۋشىلىقتىڭ الدىن الۋ جانە توتەنشە جاعدايلارداعى ءىس-ارەكەتتەرگە بايلانىستى تاجىريبەلىك تاپسىرمالاردى ورىنداپ، سۇراقتارعا جاۋاپ بەردى جانە ءتۇرلى جاعداياتتىق كەيستەردى شەشتى.
ۇيىمداستىرۋشىلار مۇنداي ينتەراكتيۆتى فورمات قۇقىقتىق اعارتۋ پروتسەسىن جاستار ءۇشىن قولجەتىمدى ءارى قىزىقتى ەتە تۇسكەن، سونداي-اق، ازاماتتىق جاۋاپكەرشىلىك پەن زاڭعا دەگەن قۇرمەت سەزىمىن قالىپتاستىرۋعا سەپتىگىن تيگىزگەنىن ايتادى.
بالقاش قالاسى پروكۋراتۋراسىنىڭ وكىلدەرى اتاپ وتكەندەي، مۇنداي شارالار قۇقىق بۇزۋشىلىقتىڭ الدىن الۋدىڭ ءتيىمدى قۇرالى بولىپ تابىلادى جانە وسكەلەڭ ۇرپاقتىڭ بويىندا ورنىقتى قۇقىقتىق ءبىلىم مەن قاۋىپسىز مىنەز-قۇلىق داعدىلارىن قالىپتاستىرۋعا كومەكتەسەدى.
بۇدان بولەك، فەستيۆال قوناقتارى ءۇشىن بالقاش قالاسى پوليتسياسى مەن توتەنشە جاعدايلار باسقارماسى قىزمەتكەرلەرىنىڭ قاتىسۋىمەن كورمە الاڭى ۇيىمداستىرىلدى. كەلۋشىلەردىڭ نازارىنا قۇقىق قورعاۋ ورگاندارى مەن قۇتقارۋ قىزمەتتەرىنىڭ ارنايى جابدىقتارى مەن تەحنيكالارى، پوليتسيا ءموتوپاترۋلى، ارنايى جاساق ساربازىنىڭ جاراقتارى، سونداي-اق، زاماناۋي اۆاريالىق-قۇتقارۋ تەحنيكالارى ۇسىنىلدى.
قۇقىقتىق كۆەست قورىتىندىسى بويىنشا قاتىسۋشىلارعا ەستەلىك سىيلىقتار تابىستالدى.
