200 تەڭگەلىك بانكنوتا پەن مونەتا زاڭدى تولەم قۇرالى سانالادى. بۇل تۋرالى ۇلتتىق بانك ەسكە سالدى، دەپ حابارلايدى “ادىرنا” ۇلتتىق پورتالى.
«نومينالى 200 تەڭگەلىك بانكنوتالاردىڭ قابىلدانباي جاتقانى تۋرالى وتىنىشتەرگە بايلانىستى قازاقستان ۇلتتىق بانكى ولاردىڭ زاڭدى تولەم قۇرالى سانالاتىنىن ەسكە سالادى. بۇل بانكنوتالار قازاقستان رەسپۋبليكاسىنىڭ بارلىق اۋماعىندا كەز كەلگەن تولەم ءتۇرى بويىنشا قابىلدانۋعا مىندەتتى»، - دەلىنگەن حابارلامادا.
قارجى رەگۋلياتورى قازاقستان اۋماعىندا اينالىمداعى ۇلتتىق ۆاليۋتا بانكنوتالارى مەن مونەتالارىن بەلگىلەنگەن قۇنىنا قاراي قابىلداۋدان باس تارتۋ – «اكىمشىلىك قۇقىق بۇزۋشىلىق تۋرالى» قازاقستان رەسپۋبليكاسى كودەكسىنىڭ 206-بابىندا كوزدەلگەن اكىمشىلىك جاۋاپكەرشىلىككە جەتەلەيتىنىن ەسكە سالادى.
«بۇعان قوسا، ۇلتتىق بانك نومينالى 200 تەڭگەلىك جاڭا بانكنوتالاردى اينالىمعا شىعارماعانىن اتاپ وتەمىز. اينالىمداعى 200 تەڭگەلىك بانكوتالار زاڭدى كۇشىن جويعان جوق، ءارى تابيعي توزىعى جەتكەندە عانا اينالىمنان شىعارىلىپ، 200 تەڭگەلىك مونەتالارمەن اۋىستىرىلادى. قوسىمشا سۇراقتار تۋىنداسا، 1477 ءنومىرى ارقىلى ۇلتتىق بانكتىڭ بايلانىس ورتالىعىنا حابارلاسۋعا بولادى»، - دەلىنگەن حابارلامادا.
