قازاقستان ۇلتتىق قورىنىڭ ۆاليۋتالىق اكتيۆتەرى 2026 جىلعى 1 شىلدەدەگى جاعداي بويىنشا 65,5 ملرد دوللاردى قۇرادى، دەپ حابارلايدى “ادىرنا”.
بۇل تۋرالى قازاقستان ۇلتتىق بانكى حابارلادى.
ۇلتتىق بانك باسقارماسى 2026 جىلدىڭ ەكىنشى توقسانىندا ۇلتتىق قور اكتيۆتەرىن سەنىمگەرلىك باسقارۋ ناتيجەلەرى تۋرالى ەسەپتى بەكىتتى. ەسەپتى كەزەڭدە قور اكتيۆتەرىنىڭ ينۆەستيتسيالىق كىرىستىلىگى 2,92 ملرد دوللار بولدى.
ۇلتتىق بانكتىڭ مالىمەتىنشە، ينۆەستيتسيالىق ناتيجەگە گەوساياسي شيەلەنىستىڭ باسەڭدەۋى، تەحنولوگيالىق سەكتوردىڭ ءوسۋى جانە الەمدىك قور نارىقتارىنىڭ قالپىنا كەلۋى اسەر ەتكەن. سونىمەن قاتار جاھاندىق وبليگاتسيالار نارىعىندا ءوسىم بايقالعان.
الايدا مۇناي مەن التىندى قوسا العاندا، بىرقاتار شيكىزات باعاسى تومەندەدى.
وتىرىستا اقشا جانە ۆاليۋتا نارىعىنداعى احۋال تۋرالى دا باياندالدى. ۇلتتىق بانك قازاقستاندا ۆاليۋتالىق وپەراتسيالاردى جۇزەگە اسىرۋ قاعيدالارىنا وزگەرىستەر مەن تولىقتىرۋلار ەنگىزدى.
جاڭا نورمالار زاڭدى تۇلعالاردىڭ قولما-قول ەمەس شەتەل ۆاليۋتاسىن ساتىپ الۋ ءتارتىبىن جەتىلدىرۋگە باعىتتالعان.
بۇدان بولەك، ۇلتتىق بانك باسقارماسى بىرقاتار قاۋلىعا وزگەرىستەر ەنگىزدى. قۇجاتتار قازاقستاننىڭ جاڭا كونستيتۋتسياسىنا، تسيفرلىق كودەكسكە جانە باسقا دا زاڭنامالىق اكتىلەرگە سايكەستەندىرىلدى.
بۇعان دەيىن پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ۇكىمەت وتىرىسىندا ۇلتتىق قوردىڭ ۆاليۋتالىق اكتيۆتەرى 2029 جىلعا قاراي 70,6 ملرد دوللارعا دەيىن ۇلعاياتىنىن ايتقان.
