بۇگىندە قالادا 9 ءبىلىم عيماراتىنىڭ كۇردەلى جوندەۋ جۇمىستارى جۇرگىزىلۋدە. جاڭا وقۋ جىلىنا دەيىن 4 مەكتەپ پەن 2 بالاباقشانىڭ جانە كوللەدج بەن 2 ارنايى مەكتەپ- ينتەرناتىنىڭ عيماراتى جوندەۋدەن وتەدى. بۇگىن قالا اكىمى م.ايتەنوۆ قۇرىلىس الاڭدارىن ارالاپ، جۇمىس بارىسىن قاداعالادى.
4-شاعىناۋدانداعى №78 ورتا مەكتەپ عيماراتى 2004 جىلى سالىنعان. جوبالىق قۋاتتىلىعى 465 ورىندىق ءبىلىم نىسانىنىڭ كۇردەلى جوندەۋ جۇمىستارى بۇگىندە 60 پايىزعا ورىندالعان. وندىرىستىك كەستەگە ساي عيمارات تامىز ايىنىڭ ورتاسىندا پايدالانۋعا بەرىلەدى.
ءبىلىم باسقارماسىنا قاراستى «ەستۋ قابىلەتى بۇزىلعان بالالارعا ارنالعان №1 ارنايى مەكتەپ-ينتەرناتى» كوممۋنالدىق مەملەكەتتىك مەكەمەسىنىڭ عيماراتى دا كۇردەلى جوندەۋ كورمەگەن ورتالىقتاردىڭ ءبىرى بولاتىن. مۇندا دا قازىر قۇرىلىس قارقىندى جۇرۋدە. جوبا بويىنشا 3 قاباتتى عيماراتتىڭ قابىرعاسى تولىق جاڭارتىلىپ، ينجەنەرلىك كوممۋنيكاتسيالىق جەلىلەرى اۋىستىرىلادى.
قالاداعى ۆ.تەرەشكوۆا اتىنداعى №93 جالپى ءبىلىم بەرەتىن مەكتەپتىڭ عيماراتى دا زامانا تالابىنا ساي جابدىقتالۋدا. جاڭاتالاپ شاعىناۋدانىنداعى مەكتەپتىڭ ءبىرىنشى كورپۋسى 1951 جىلى سالىنعان. اۋماقتا وقۋشى سانى ارتقاندىقتان، سوڭعى جىلدارى مەكتەپ كەڭەيتىلىپ، قايتا جاساقتالعان. مۇندا دا ينجەنەرلىك جۇيەلەر تولىق جاڭالانۋدا. جوبا بويىنشا قوسىمشا سپورت الاڭشاسى سالىنىپ، كورىكتەندىرۋ، اباتتاندىرۋ جۇمىستارى جۇرگىزىلەدى.
اتالعان نىسانداردى ارالاپ كورگەن م.دۇيسەنبەكۇلى جاۋاپتىلارعا مەردىگەرلەر جاۋاپكەرشىلىگىن ارتتىرا وتىرىپ، ەڭ الدىمەن ساپانى باقىلاۋعا الۋدى تاپسىردى. سونداي-اق وندىرىستىك كەستەگە ساي كۇردەلى جوندەۋ جۇمىستارىن تولىق اياقتاپ، ءبىلىم وشاقتارىن جاڭا وقۋ جىلىنا ساقاداي ساي ەتىپ جاساقتاۋدى ەسكەرتتى.
