25 شىلدە كۇنى الماتى "باراحولكا" بازارى ماڭىندا ورىن العان جول كولىك وقيعاسىنان 15 جاستاعى ءجاسوسپىرىم قىز زارداپ شەكتى. وقيعاعا قاتىستى زاڭگەر پىكىر ءبىلدىردى، دەپ جازادى "ادىرنا" ءتىلشىسى.
"الاتاۋ اۋدانى اۋماعىندا جول كولىك وقيعاسى بولعان جەردە جاياۋ جۇرگىنشىلەر كوپىرى ورنالاسقان. الايدا، ۆيدەودان بايقاعانداي وتباسى مۇشەلەرى تىيىم سالىنعان تۇستان وتكەن. بىرىنشىدەن، اتا-انانىڭ بالا ومىرىنە سالعىرتتىعى. ءوز ومىرىنە، بالا-شاعاسىنىڭ ومىرىنە نەمقۇرايلى قاراعاندىعىنىڭ بەلگىسى. جاعداي بويىنشا قىلمىستىق ءىس قوزعالىپ، ساراپتامالىق ەكسپەرتيزا تاعايىندالدى. جۇك كولىگىنىڭ جۇرگىزۋشىسىنە ەشقانداي شارا قولدانىلمايدى. ويتكەنى ولار جاياۋ جۇرگىنشىلەرگە تىيىم سالىنعان جەردەن ءوتىپ وتىر. زارداپ شەككەن 15 جاستاعى قىزدىڭ اتا-اناسىنا قر اكىمشىلىك كودەكسىنىڭ 127-بابىنىڭ تالاپتارىنا سايكەس ايىپپۇل سالىناتىن بولادى. ارقايسىمىز ءوز ءومىرىمىز ءۇشىن جانە بالالارىمىزدىڭ ءومىرى ءۇشىن جاۋاپتىمىز. جولدا جۇرگەندە ساق بولايىق" دەدى زاڭگەر قۋات اۋعانبەك.
ەسكە سالا كەتەيىك، وسىعان دەيىن الماتى بازارىندا 15 جاستاعى قىزدىڭ جۇك كولىگىنىڭ استىندا قالعانى تۋرالى مالىمدەگەن بولاتىنبىز. الماتى قالاسى قوعامدىق دەنساۋلىق ساقتاۋ باسقارماسى زارداپ شەككەن ءجاسوسپىرىمنىڭ جاعدايىنا قاتىستى تۇسىنىكتەمە بەردى.
