الماتىنىڭ قىلمىستىق ىستەر جونىندەگى مامانداندىرىلعان سوتىندا قالا قۇرىلىسى باسقارماسىنىڭ بۇرىنعى باسشىسى الماسحان احمەدجانوۆ پەن جەر قاتىناستارى ءبولىمىنىڭ بۇرىنعى باسشىسى ارداق سامامبەتوۆتىڭ ءىسى بويىنشا ءجارىسسوز ءوتتى، دەپ حابارلايدى “ادىرنا” ۇلتتىق پورتالى ماسساگەتكە سىلتەپ.
پروكۋرور احمەدجانوۆتى قىزمەت بابىن اسىرا پايدالاندى جانە الاياقتىق جاسادى دەپ ايىپتاپ، 12 جىلعا باس بوستاندىعىنان ايىرۋدى سۇرادى. سونداي-اق، ونىڭ مۇلكىن تاركىلەۋ جانە مەملەكەتتىك قىزمەتتە جۇمىس ىستەۋ قۇقىعىنان ايىرۋ ۇسىنىلدى.
تەرگەۋ مالىمەتتەرى بويىنشا، احمەدجانوۆ پەن سامامبەتوۆ الماتىنىڭ تاۋلى ايماقتارىندا جەكە تۇرعىن ءۇي سالۋعا ارنالعان جەرلەرگە ءىرى تۇرعىن ءۇي كەشەندەرىن زاڭسىز سالۋعا رۇقسات بەرگەن. ولار قۇجاتتاردى راسىمدەۋ بارىسىندا زاڭ بۇزۋشىلىقتارعا جول بەرىپ، كاداسترلىق تولەمدەردى اينالىپ وتكەن.
سونىمەن قاتار، تۇرعىن ءۇي كەشەنىندە قابات سانى مەن عيماراتتىڭ تىعىزدىعى بويىنشا زاڭ بۇزۋشىلىقتار انىقتالعان. تەرگەۋشىلەردىڭ مالىمەتىنشە، احمەدجانوۆ وسى زاڭسىز ارەكەتتەرىنىڭ ورنىنا تۇرعىن ءۇي كەشەندەرىنەن تۋىستارىنا پاتەر العان.
پروكۋرور سوتتالۋشىلاردىڭ كىشكەنتاي بالالارى بارىن جازانى جەڭىلدەتەتىن، ال انتتى بۇزعاندارىن اۋىرلاتاتىن ءمان-جاي رەتىندە قاراستىرۋدى سۇرادى.
سونداي-اق، پروكۋرور ارداق سامامبەتوۆتى كىنالى دەپ تانىپ، ونى بەلگىلى ءبىر لاۋازىمداردى اتقارۋ قۇقىعىنان ءومىر بويىنا ايىرۋ جانە 12 جىلعا باس بوستاندىعىنان ايىرۋدى سۇرادى.
سوتتىڭ ۇكىمى جاقىن كۇندەرى جاريالانادى.
