اقتوبەنىڭ ايتەكە بي اۋدانىندا ءۇش قىز سۋعا باتىپ كەتتى. بۇل تۋرالى وبلىستىڭ توتەنشە جاعدايلار دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
ولار 16, 12 جانە 10 جاستا.
بۇگىن ساعات 16:45-تە قۇتقارۋ قىزمەتىنە ايتەكە بي اۋدانى ارالتوعاي اۋىلىنان 3 شاقىرىم قاشىقتىقتاعى ىرعىز وزەنىنە 3 ءجاسوسپىرىم قىزدىڭ سۋعا باتىپ كەتكەنى تۋرالى حابارلاما ءتۇستى. ولار تىيىم سالىنعان جەرگە شومىلعان. وقيعا ورنىندا كۋاگەرلەر 2007 جانە 2011 جىلعى تۋعان قىزداردىڭ دەنەسىن سۋدان الىپ شىقتى.
2013 جىلى تۋعان قىز بالانىڭ دەنەسىن جەدەل قۇتقارۋ جاساعىنىڭ قۇتقارۋشىلارى ساعات 21:32-دە جاعادان 10 مەتر قاشىقتىقتا 6 مەتر تەرەڭدىكتەن شىعاردى. بولجام بويىنشا 2007, 2011 جانە 2013 جىلى تۋعان 3 قىزدىڭ ەكەۋى ايتەكە بي اۋدانىنىڭ تۇرعىندارى، ءۇشىنشىسى ىرعىز اۋدانىنان سول اۋىلعا قوناققا بارعان. سۋعا شومىلۋ كەزىندە ءبىر قىز بالانىڭ اناسى ولاردىڭ جانىندا بولعان، - دەلىنگەن حابارلامادا.
اقتوبە وبلىستىق ءبىلىم باسقارماسىنىڭ باسشىسى جايىق سۇلتاننىڭ حابارلاۋىنشا ولار ءار ءۇيدىڭ بالالارى.
