اقتوبە وبلىسىندا جانتۇرشىگەرلىك جول اپاتى ورىن الىپ، 12 ادام كوز جۇمدى، دەپ حابارلايدى "ادىرنا" ۇلتتىق پورتالى جەرگىلىكتى پد ءباسپاسوز قىزمەتىنە سىلتەمە جاساپ.
قايعىلى جاعداي 23 قازان كۇنى سامارا – شىمكەنت تاسجولىندا، بەلقوپا اۋىلىنىڭ ماڭىندا بولعان. الدىن الا مالىمەتتەر بويىنشا، DAF ماركالى جۇك كولىگى قارسى باعىتقا شىعىپ، جولاۋشىلار مىنگەن “گازەل” اۆتوكولىگىمەن سوقتىعىسقان.
پوليتسيانىڭ حابارلاۋىنشا، جول اپاتى سالدارىنان ەكى جۇرگىزۋشى مەن “گازەلدەگى” 10 جولاۋشى وقيعا ورنىندا قازا تاپقان. تاعى بەس ادام ءتۇرلى جاراقاتپەن اۋرۋحاناعا جەتكىزىلدى.
قايعىلى وقيعا بويىنشا سوتقا دەيىنگى تەرگەۋ باستالدى. بەلگىلى بولعانداي، “گازەل” رەسمي تۇردە جۇرگەنەۆ اتىنداعى اۋىلدان وبلىس ورتالىعىنا جولاۋشى تاسىمالداۋمەن اينالىسقان.
قازىرگى تاڭدا وقيعا ورنىندا پوليتسيا قىزمەتكەرلەرى مەن تەرگەۋ توبى جۇمىس ىستەپ جاتىر. بارلىق ءمان-جاي انىقتالۋدا.
اقتوبە وبلىسى اكىمدىگىنىڭ مالىمەتىنشە، زارداپ شەككەندەر حرومتاۋ اۋداندىق اۋرۋحاناسىنا جەتكىزىلگەن. ولاردىڭ ۇشەۋىنىڭ جاعدايى اۋىر، ەكەۋىنىڭ جاعدايى ورتاشا اۋىرلىقتا. ءبىر ادام اۋرۋحاناعا جاتۋدان باس تارتقان.
وبلىس اكىمى اسحات شاحاروۆ وقيعا ورنىنا بارىپ، جاعدايمەن تانىستى.
