جالپى ءبىز ەس بىلگەلى جىنداردىڭ اتاسى ءىبىلىس ەكەنىن ەستىپ، ءبىلىپ، وستىك. ەشبىر يمام نە اۋىل مولداسى مىناۋ ۆيدەوداعىداي جااان دەگەن جىننىڭ اتاسى دەپ ۇيرەتپەگەن ەدى. وسى بىزدە ءدىني يدەولوگيا دۇرىس ەمەس نەمەسە يمامدار دۇرىس جەتكىزە المايدى. مىناۋ نە ايتىپ وتىر ءوزى؟ شىنىندا ءدىني باسقارماعا قاراستى ءدىن وكىلى ما ، الدە اپارعان فيرمانىڭ جالدامالى مولداسى ما؟ قازاق حالقى ءوزىنىڭ جانىنا جاقىن ادامىن جانىم دەپ ايتقان. ياعني جانىم ءسوزى بىزدەر ءۇشىن ەڭ قاستەرلى ءسوز. جانىم انا, جانىم اكە، جان-جارىم، جان باۋىرىم، دەگەن قاستەرلى دە قاسيەتتى سوزدەردەن قۇرالعان ولەڭدەر، اندەر، ءتىپتى «جانىم» دەگەن كينوفيلمدە بار. سونىڭ بارلىعىن تەرىسكە شىعارىپ وتىر ما مىناۋ؟ سوندا وسى ۋاقىتقا دەيىن ايتىلىپ كەلگەن، „جانىم انا” „جان-جارىم” دەگەن ت.ب سوزدەر جىنداردىڭ اتاسىمەن بايلانىستى بولعانى ما؟ ءتىپتى ۇيالى تەلەفونىنا جاقىن ادامىن وسىلاي ساقتاپ قويعاندار كوپ عوي. جۇبايىن جاقىن ادامىن وسى سوزبەن ەركەلەتىپ جۇرگەن، ءدىني ساۋاتى از قانشاما ادامدار، مىناۋ ۆيدەودان كەيىن «ەي، سەنگە» نەمەسە اتىن اتاپ شاقىرۋعا كوشپەسىنە كىم كەپىل؟ ايتقان سوزىنە جاۋاپ بەرسىن.
جانىم ءسوزى ---سىيلاستىقتىڭ، قۇرمەتتىڭ، ءىلتيپاتتىڭ بەلگىسى.
مىسالى مەن ءۇشىن „جانىم” ءسوزى جۇرەگىمە جۇمساق تيسە ، قۇلاعىما جاعىمدى ەستىلەدى. ال، وكتەم التاەۆتىڭ „جانىم ءبىر كورىپ عاشىق بولدىم ساعان” دەگەن ولەڭ جولدارى، جىننىڭ اتاسىن ءبىر كورىپ عاشىق بولدىم ساعان بولعانى ما ؟ نە ساندىراق بۇل؟ وسى قاجىلىققا اپاراتىن تۋر فيرمالاردىڭ مىناۋ ۆيدەوداعىداي ءدىن وكىلىن كىمدەر ىرىكتەيدى، قازاقستان مۇسىلماندار ءدىني باسقارماسى قاداعالايدى ما؟ جالپى كىم جاۋاپتى؟ الدە تويعا اسابا جالداعان سياقتى قولى جەتكەنىن الىپ بارا بەرەدى ما؟
شتامپ جاسادىڭ با، ماعىناسىن دۇرىس بەر، بولماسا ۇندەمە. قازاققا كەلەتىن دۇنيە بار، كەلمەيتىن دۇنيە بار. ۋاعىز ايتاتىن كەزدە وسىنىڭ بارلىعى ەسكەرىلۋى ءتيىس. وندا ءبىر يمام شىقسىن دا «مۋكا» ءسوزى ەشقانداي ۇن ەمەس، ول قايعىرۋ دەگەن جامان ءسوز دەسىن. جۇرەيىك سوسىن ميىمىز اشىپ مۋكالاپ. بۇلاي نە بولسا سونى ايتا بەرۋگە بولمايدى. ونىڭ ۇستىنە اسىل ءدىنىمىز يسلام دا بارلىق سۇراقتارعا جاۋاپ تابىلادى. حالىقتىڭ ميىن اشىتپاي، تىگىسىن جاتقىزىپ، جەتكىزۋ كەرەك. ىزدەنگەن يمامعا قازاقتا جەتكىزەتىن ادەمى سوزدەر كوپ.
باس سالىپ وسىنداي شوشىتاتىن اڭگىمە ايتۋدان ۇتىلماساق ۇتپايمىز. بۇنداي كەلتە ماعىناسى بار ۋاعىزدارعا توقتاۋ بولۋى كەرەك. مەن ءۇشىن ۇلتىمنىڭ ءبىر-ءبىرىن جانىم دەپ قۇرمەتتەپ جۇرگەنى ماڭىزدى.
ادامداردىڭ مەيىرىمى، جىلۋى، ازايىپ اجىراسۋلار كوبەيىپ بارا جاتقان مىناۋ زاماندا، وسى ءاندى ءجيى ايتىپ بەرۋگە، تىڭداۋعا، كەڭەس بەرەمىن. وتباسىن ساقتاپ قالۋعا، قارىم-قاتىناستى نىعايتۋعا كومەكتەسەدى.
جانىم، جانىم، جانىم، دەشى.
سىزىلتىپ سالعان ءانىم دەشى،
ماعان قاراپ كۇلىمدەشى سەن.
[video width="226" height="400" mp4="https://adyrna.kz/content/uploads/2019/04/57461817_665922410512203_2438499147234410496_n.mp4"][/video]
بەيبىت قازىبەكوۆ
