قىرعىزستان پرەزيدەنتى سادىر جاپاروۆ 17 شىلدەدە كولىك جانە كوممۋنيكاتسيالار مينيسترلىگىنە 265 بىرلىك تەحنيكا تابىستادى. وسى سالتاناتتى شارادا قىرعىز باسشىسى ءسوز سويلەپ، ەكى قازاقستان مەن قىرعىزستان جەمقورلارى تۋرالى قاعىتپا قالجىڭ دا ايتتى. ء"ومىردىڭ وزىندەي" بولعان قالجىڭ ارقىلى ءبىراز ماسەلەنىڭ شەتىن شىعاردى، دەپ حابارلايدى ادىرنا ۇلتتىق پورتالى.
قىرعىزستان پرەزيدەنتى سالتاناتتى شارادا سويلەگەن سوزىنە جەمقورلىق تۋرالى ءازىل قوسقان. ول ءازىلدىڭ ءبىر ۇشى قازاقستانداعى جەمقورلىققا تيەدى.
"قازاق پەن قىرعىز دوس بولىپ، ماسكەۋدەگى جول ۋنيۆەرسيتەتىن ءتامامداپ بىرەۋى الماتىعا، ەكىنشىسى بىشكەككە كەلەدى. ارادا ءبىر جىل وتەر-وتپەستەن قازاق قىرعىز دوسىن "شاي بەرىپ قويايىن" دەپ شاقىرادى. بارسا، ەكى قابات ءۇي، التى جۇزدىك "مەرسەدەس", جاعدايى كەرەمەت ەكەن. قىرعىز قازاق دوسىنان: "بىلتىر عانا ەكەۋمىز ستۋدەنت ەدىك. ءبىر جىلدا قالاي بايىپ كەتكەنسىڭ؟ ماعان مۇنىڭ قۇپياسىن اشپايسىڭ با؟" دەپ سۇرايدى. قازاق دوسى ونى الماتىنىڭ شەتىنە الىپ شىعىپ: "مىنا جولدى كوردىڭ بە؟ وسى جولدى مەن سالدىم. شەتىنەن بەس سانتيمەتر، قالىڭدىعىنان ءبىر سانيمەتر ۇنەمدەدىم. ءسويتىپ بايىدىم" دەيدى.
قىرعىز ەلىنە قايتىپ، ءۇش ايدان كەيىن قازاق دوسىن قوناققا شاقىرادى. كەلسە، قىرعىز قازاق دوسىنان ەكى ەسە بايىپ العان. ءۇش قابات ءۇي، "گەلەندۆاگەن", ساياجاي...
قازاق وعان "سەن ءۇش اي بۇرىن ءبىر بولمەلى پاتەر جالداپ تۇرۋشى ەدىڭ عوي" دەيدى. سويتسە قىرعىز قازاق دوسىنا قارابالتاعا دەيىنگى جەردى كورسەتىپ "مۇندا جول سالىنۋ كەرەك ەدى. مەن سالماي قويدىم" دەپتى.
پرەزيدەنتتىڭ استارلى بۇل ءازىلى جينالعانداردىڭ بارلىعىنىڭ جۇزىنە كۇلكى ۇيىرگەنى بايقالادى.
ەستەرىڭىزگە سالا كەتەيىك، التى جىلدان بەرى جوندەلىپ بىتپەي جاتقان بىشكەك - قارابالتا اراسىن جالعايتىن 52 شاقىرىمدىق تاس جول قىرعىزستاندا ءجيى سىنالادى. كەيبىر جوندەلگەن تۇسىنىڭ وزىندە تەكسەرۋ كەزىندە ساپاسىز جوندەۋ جاسالعانى انىقتالىپ، قوعام نازارىندا كەلە جاتقان قۇرىلىستىڭ ءبىرى. جوندەۋ جۇمىسى باستالعاننان بەرگى ارالىقتا ەلدە بيلىك اۋىسىپ، وعان قوسا جول قۇرىلىسىن جوندەيتىندەر اۋىسىپ، بىشكەك - قارابالتا جولى قىرعىزستاندا تاۋسىلمايتىن جىرعا اينالىپ كەتكەنى ءمالىم.
"ادىرنا" ۇلتتىق پورتالى
