قىرعىزستان پرەزيدەنتى سادىر جاپاروۆ جالال-اباد وبلىسىنىڭ سوزاق اۋدانىندا بولعان جۇك كولىگى مەن وقۋشىلار اراسىنداعى اپاتقا قاتىستى ءمان-جايدى زەرتتەۋ ءۇشىن ارنايى كوميسسيا قۇرۋدى تاپسىردى، دەپ حابارلايدى "ادىرنا" ۇلتتىق پورتالى قىرعىزستان مەملەكەتى باسشىسىنىڭ ءباسپاسوز قىزمەتىنە سىلتەپ.
«قىرعىز رەسپۋبليكاسىنىڭ پرەزيدەنتى سادىر جاپاروۆ 2 مامىردا جالال-اباد وبلىسى سوزاق اۋدانى جەرگە-تال اۋىلىندا «پورتەر» جۇك كولىگىمەن بولعان وقيعاعا قاتىستى بارلىق ءمان-جايدى انىقتاۋ ءۇشىن كوميسسيا قۇرۋدى تاپسىردى. كوميسسيا قۇرامىنا ءتيىستى مينيسترلىكتەر مەن پرەزيدەنت اكىمشىلىگىنىڭ وكىلدەرى كىردى»، - دەلىنگەن حابارلامادا.
كوميسسيا جۇمىسىنىڭ قورىتىندىسى بويىنشا «ءتيىستى شەشىمدەر» قابىلدانادى، دەپ اتاپ ءوتتى ءباسپاسوز قىزمەتى. «مەملەكەت باسشىسىنىڭ اتىنان زارداپ شەككەندەرگە قارجىلاي كومەك كورسەتىلدى، بالالاردىڭ دەنساۋلىعىنىڭ جاي-كۇيى تۋرالى پرەزيدەنت سادىر جاپاروۆقا ۇدايى مالىمەت بەرىلىپ وتىرادى»، - دەپ جازدى.
ەستەرىڭىزگە سالا كەتەيىك، 2 مامىر كۇنى قىرعىزستاننىڭ سوزاق اۋدانىندا "بالمۇزداق تيەلگەن فۋرگون" دەپ حابارلانعان جۇك كولىگى اشىق اسپان استىندا «ماناس» ەپوسىن ورىنداعان 29 وقۋشىنى قاعىپ كەتكەنىن حابارلاعان بولاتىنبىز. وقيعادان كەيىن ەلدىڭ ءبىلىم مينيسترلىگى مۇنداي شارالاردى وتكىزۋگە تىيىم سالدى. توتەنشە جاعدايدان كەيىن مەديتسينالىق كومەككە 35 بالا مەن ءجاسوسپىرىم جۇگىنىپ، ونىڭ 20-سى اۋرۋحاناعا جاتقىزىلدى. بەسەۋى جانساقتاۋ بولىمىندە ەكەنى ايتىلدى.
