تىنىق مۇحيتىندا 51 جاستاعى تيم شەددوك ەسىمدى اۆستراليالىق ازامات قۇتقارىلدى، دەپ حابارلايدى “ادىرنا” جەرگىلىكتى 9 NEWS تەلەكومپانياسىنا سىلتەمە جاساپ.
تيم شەددوك يتىمەن بىرگە ءوز كەمەسىندە ءۇش اي بويى اشىق مۇحيت ايدىنىندا جۇزگەن. ول ءساۋىر ايىندا مەكسيكانىڭ لا-پاس پورتىنان كاتامارانمەن جولعا شىعادى. تىنىق مۇحيتى ارقىلى فرانتسۋز پولينەزياسىنا دەيىن 6000 شاقىرىمدى ەڭسەرۋدى جوسپارلاعان. جولاۋشى وزىمەن بىرگە ءيتى بەللانى العان.
الايدا بىرنەشە اپتادان سوڭ مۇحيتتا قاتتى داۋىل ورىن الىپ،
كاتامارانداعى ەلەكترونيكا مەن راديوبايلانىستى ىستەن شىعارىپ، كاتاماراندى باسقارۋ مۇمكىن بولماعان. ولاردى تەك 3 ايدان سوڭ عانا، 6 شىلدە كۇنى تىكۇشاقپەن ءوتىپ بارا جاتقاندار بايقاعان.
3 اي بويى بەللا مەن ونىڭ قوجايىنى جاڭبىر سۋىن ءىشىپ، مۇحيتتا ۇستالعان شيكى بالىقتى جەپ، كۇن كورگەن. الىس ساپارعا شىققانداردىڭ بالىق اۋلايتىن تورى بولعان.
قازىر ولار قۇتقارىلىپ، مەكسيكاعا قايتىپ بارا جاتىر. تەڭىزگە جالعىز ساياحاتتاۋدى ءجون ساناعان 51 جاستاعى اۆستراليالىق:
"مەن تەڭىزدە وتە قيىن سىناقتان ءوتتىم. ماعان تەك دەمالىس پەن جاقسى تاماق كەرەك. ويتكەنى كوپتەن بەرى جالعىز بولدىم. ايتپەسە، دەنساۋلىعىمدا ءبارى جاقسى", - دەيدى.
دارىگەرلەر 3 اي بويى مۇحيتتا بولعان ساياحاتشىلاردىڭ قازىرگى جاعدايى جاقسى ەكەنىن مالىمدەدى.
