شىمكەنتتە سۋرەتشىلەرگە ارنالعان ارت-كەڭىستىك اشىلدى

شىمكەنتتە 19 ماۋسىم – قالا كۇنىنە وراي، ورتالىق ساياباقتا ارت-كەڭىستىگى اشىلدى. نىسان سۋرەت سالۋ ونەرىنەن سىر شەرتىپ، قالا تۇرعىندارى اراسىندا شاعىرماشىلىق كلاستەرىنىڭ دامۋىنا ىقپال ەتەدى. ارنايى كەڭىستىكتىڭ جۇمىسىمەن تانىسقان قالا اكىمى مۇرات ايتەنوۆ مۇنداي ورىندار قالاعا اسا قاجەت ەكەنىن ايتتى. –سۋرەتشىلەر ءوز تۋىندىسىن وسى ارت-كەڭىستىگى ارقىلى قالا تۇرعىندارىنا ۇسىنا الادى. بۇل قوعامدىق ورىنداردى جاڭعىرتۋ مەن قالا تۇرعىندارىنا قولايلى ورتا قالىپتاستىرۋدىڭ ءبىر ءتۇرى. بۇگىنگى گالەرەيا تەك باستاماسى عانا. ءبىز الداعى ۋاقىتتا ۇلكەن ورتالىق اشۋ ءۇشىن جوبا جاساپ جاتىرمىز. وندا سۋرەتشىلەر مەن قولونەر شەبەرلەرى ءبىر ورتالىققا ۇيىسىپ، ۇلتتىق ونەرىمىزدىڭ جاڭعىرۋىنا، وسكەلەڭ ۇرپاققا ۇلتتىق ونەرىمىزدى دارىپتەۋگە قىزمەت ەتەتىن ورىنعا اينالادى، - دەدى قالا اكىمى. شابىت پەن جاڭا مۇمكىندىكتەرگە جول اشاتىن ارت-كەڭىستىكتە سۋرەتشىلەردىڭ جاڭا تۋىندىلارى قويىلعان. قىلقالام شەبەرلەرى ارنايى كەڭىستىكتىڭ اشىلۋى قازاقستان سۋرەتشىلەر وداعىنىڭ 90 جىلدىعىنا تۇسپا-تۇس كەلگەنىنە قۋانىشتى. –بۇگىن قالا اكىمدىگى ساياباق جانىنان ارت-كەڭىستىگىن جاساقتاپ، شىمكەنتتىك سۋرەتشىلەرگە سىيعا تارتىپ وتىر. مۇنداي مەرەيلى ءسات قازاقستان سۋرەتشىلەر وداعىنىڭ 90 جىلدىق مەرەيتويىمەن قاتار كەلگەنىنە وتە قۋانىشتىمىز. جالپى، قالامىزدا 5 جىل الدىن 20 سۋرەتشى بولسا، بۇگىندە ولاردىڭ سانى 30-عا جەتىپتى. قىلقالام شەبەرلەرى وسى ورىنعا كەلىپ، حالىققا ءوز تۋىندىلارىن تانىستىرۋعا جانە ساتۋىنا بولادى. بۇگىن تاڭنان بەرى ساياباققا كەلۋشىلەر سۋرەتتەردى تاماشالاپ، سۋرەتشىلەرگە قىزىقتىرعان سۇراعىن قويىپ، جىلى سۇحبات قۇرۋدا. تۇرعىنداردىڭ ونەرىمىزگە دەگەن قىزىعۋشىلىعى قاتتى تاڭقالدىردى. ارت-كەڭىستىك سۋرەتشىلەردى حالىققا ءبىر تابان جاقىنداتتى، - دەدى قازاقستان سۋرەتشىلەر وداعىنىڭ شىمكەنت قالالىق فيليالىنىڭ توراعاسى ءابدىمۇتالىپ احمەتوۆ. ارت-كەڭىستىككە جاس دارىندىلاردىڭ ونەرى دە قويىلعان. بۇگىنگى اشىلۋ سالتاناتىندا ءوز تۋىندىسىن ۇسىنعان 12 جاستاعى ادەليا شىمكەنتتىڭ كورىكتى جەرلەرىن قىلقالامى ارقىلى سۋرەتتەگەن. – شىمكەنتتىڭ كورىكتى جەرلەرىن، اسەم تابيعاتىن سۋرەتتەگەندى ۇناتامىن. بۇگىنگى كورمەدە «دەندروساياباق» اتتى ءوز تۋىندىمدى ۇسىندىم. الداعى كۇندەرى وزگە تۋىندىلارىمدى وسى كورمەگە قويۋدى جوسپارلاپ وتىرمىن، - دەيدى جاس سۋرەتشى. ارت-كەڭىستىكتە جاس سۋرەتشىلەرگە شەبەرلىك ساباقتارى دا ۇيىمداستىرىلماق. سونداي-اق، بۇل ورىن قالامىزداعى جاڭا تالانتتاردى اشىپ، ءاربىر سۋرەتشىنىڭ ءوزىن تانىتا الاتىن تاماشا ورىنعا اينالادى. كورمە بارلىعىنا اشىق!