Shymkentte 19 maýsym – Qala kúnine oraı, Ortalyq saıabaqta art-keńistigi ashyldy. Nysan sýret salý ónerinen syr shertip, qala turǵyndary arasynda shaǵyrmashylyq klasteriniń damýyna yqpal etedi. Arnaıy keńistiktiń jumysymen tanysqan qala ákimi Murat Áıtenov mundaı oryndar qalaǵa asa qajet ekenin aıtty.
–Sýretshiler óz týyndysyn osy art-keńistigi arqyly qala turǵyndaryna usyna alady. Bul qoǵamdyq oryndardy jańǵyrtý men qala turǵyndaryna qolaıly orta qalyptastyrýdyń bir túri. Búgingi galereıa tek bastamasy ǵana. Biz aldaǵy ýaqytta úlken ortalyq ashý úshin joba jasap jatyrmyz. Onda sýretshiler men qolóner sheberleri bir ortalyqqa uıysyp, ulttyq ónerimizdiń jańǵyrýyna, óskeleń urpaqqa ulttyq ónerimizdi dáripteýge qyzmet etetin orynǵa aınalady, - dedi qala ákimi.
Shabyt pen jańa múmkindikterge jol ashatyn art-keńistikte sýretshilerdiń jańa týyndylary qoıylǵan. Qylqalam sheberleri arnaıy keńistiktiń ashylýy Qazaqstan Sýretshiler Odaǵynyń 90 jyldyǵyna tuspa-tus kelgenine qýanyshty.
–Búgin qala ákimdigi saıabaq janynan art-keńistigin jasaqtap, shymkenttik sýretshilerge syıǵa tartyp otyr. Mundaı mereıli sát Qazaqstan Sýretshiler odaǵynyń 90 jyldyq mereıtoıymen qatar kelgenine óte qýanyshtymyz. Jalpy, qalamyzda 5 jyl aldyn 20 sýretshi bolsa, búginde olardyń sany 30-ǵa jetipti. Qylqalam sheberleri osy orynǵa kelip, halyqqa óz týyndylaryn tanystyrýǵa jáne satýyna bolady. Búgin tańnan beri saıabaqqa kelýshiler sýretterdi tamashalap, sýretshilerge qyzyqtyrǵan suraǵyn qoıyp, jyly suhbat qurýda. Turǵyndardyń ónerimizge degen qyzyǵýshylyǵy qatty tańqaldyrdy. Art-keńistik sýretshilerdi halyqqa bir taban jaqyndatty, - dedi Qazaqstan Sýretshiler odaǵynyń Shymkent qalalyq fılıalynyń tóraǵasy Ábdimútálip Ahmetov.
Art-keńistikke jas daryndylardyń óneri de qoıylǵan. Búgingi ashylý saltanatynda óz týyndysyn usynǵan 12 jastaǵy Adelıa Shymkenttiń kórikti jerlerin qylqalamy arqyly sýrettegen.
– Shymkenttiń kórikti jerlerin, ásem tabıǵatyn sýrettegendi unatamyn. Búgingi kórmede «Dendrosaıabaq» atty óz týyndymdy usyndym. Aldaǵy kúnderi ózge týyndylarymdy osy kórmege qoıýdy josparlap otyrmyn, - deıdi jas sýretshi.
Art-keńistikte jas sýretshilerge sheberlik sabaqtary da uıymdastyrylmaq. Sondaı-aq, bul oryn qalamyzdaǵy jańa talanttardy ashyp, árbir sýretshiniń ózin tanyta alatyn tamasha orynǵa aınalady. Kórme barlyǵyna ashyq!
