وسكەمەندە اباي ەسكەرتكىشىنىڭ تۇعىرىن شيمايلاعان ءجاسوسپىرىمنىڭ زاڭدى وكىلدەرىنە ايىپپۇل سالىندى. مۇنداي شەشىم «كامەلەتكە تولماعاندار ءۆانداليزمى» بابى بويىنشا اكىمشىلىك ءىس اياسىندا قابىلداندى، دەپ حابارلايدى "ادىرنا" ۇلتتىق پورتالى YK-news.kz-كە سىلتەمە جاساپ.
جەرگىلىكتى پوليتسيا 10 شىلدەدە اباي ەسكەرتكىشىنە بەلگىسىز بىرەۋلەردىڭ سۋرەت سالىپ كەتكەنى تۋرالى اقپارات العان. "شيماي سۇيگەن شالاعايلار" ۆيدەوباقىلاۋ كامەرالارى ارقىلى انىقتالدى.
شىعىس قازاقستان وبلىستىنىڭ پوليتسيا دەپارتامەنتى بۇعان قاتىستى:
«2 شىلدە كۇندىز كامەلەتكە تولماعان ءۇش ءجاسوسپىرىم ەسكەرتكىشكە ۆەلوسيپەدپەن كەلگەن. ولاردىڭ ءبىرى ەسكەركىشكە جازۋ جازىپ كەتتى»،- دەپ جازدى.
«سۋرەتشى» تابىلىپ، سوتقا «كامەلەتكە تولماعاندار ءۆانداليزمى» 448-بابى بويىنشا اكىمشىلىك ءىس بەرىلدى. 13 شىلدەدە سوتتا قارالدى.
ايتا كەتەيىك، بۇل باپ بويىنشا جاسوسپىرىمدەردىڭ اتا-اناسى نەمەسە زاڭدى وكىلدەرى جاۋاپقا تارتىلادى. اتاپ ايتقاندا، 15 اەك نەمەسە 51750 تەڭگە ايىپپۇل سالىندى.
"ادىرنا" ۇلتتىق پورتالى
