شىعىس قازاقستان وبلىسىنىڭ اكىمى نۇرىمبەت ساقتاعانوۆ وسكەمەن قالاسىنداعى ەكولوگيالىق احۋالدى جاقسارتۋ باعىتىندا اتقارىلىپ جاتقان جۇمىستار تۋرالى مالىمدەدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
اكىمنىڭ ايتۋىنشا، وسكەمەندەگى اتموسفەرالىق اۋانىڭ نەگىزگى لاستاۋشىلارىنا اۆتوكولىك، ونەركاسىپ ورىندارى جاتادى.
قالانى ەكولوگيالىق تۇرعىدا ساۋىقتىرۋ ءۇشىن ءۇش جىلدىق جوسپار قابىلدانىپ، ونى جۇزەگە اسىرۋعا 10,5 ملرد تەڭگە قاراستىرىلعان. سونىمەن قاتار، جەرگىلىكتى بيلىك ءىرى ونەركاسىپ كاسىپورىندارىمەن ارنايى ەكولوگيالىق مەموراندۋمعا قول قويعان.
«ەكولوگيا دەپارتامەنتىنىڭ ماماندارى كەز كەلگەن ۋاقىتتا كەز كەلگەن كاسىپورىنعا كىرىپ، زامەر جۇرگىزە الادى. قاجەت بولعان جاعدايدا ءوندىرىس قۋاتى ۋاقىتشا تومەندەتىلەدى. مىسالى، جاقىندا كازتسينك مەتاللۋرگيا ءوندىرىسىن 20%-عا، تسينك ءوندىرىسىن 50%-عا قىسقارتتى»، – دەدى وبلىس اكىمى.
وسكەمەندە شىعارىندىلاردىڭ ناقتى كوزىن انىقتاۋ ءۇشىن 25 ستاتسيونارلىق ەكوبەكەت ورناتىلىپ جاتىر.
32 مىڭنان استام جەكە ءۇي پەشپەن جىلىناتىندىقتان، بيلىك ولاردى ورتالىق جىلۋ جۇيەسىنە قوسۋ جوباسىن دا قولعا العان.
تۇرعىندار وسكەمەندەگى لاس اۋا، وزەن مەن توپىراق جاعدايىنا قاتىستى جىلدار بويى شاعىمدانىپ كەلەدى. الايدا قالانىڭ نەگىزگى ءوندىرىس ورىندارى – قالا قالىپتاستىرعان كاسىپورىندار بولعاندىقتان، ولاردى كوشىرۋ مۇمكىن ەمەس.
