«ادىلەت» پارتياسى فراكتسياسىنىڭ دەپۋتاتى مەيرامباي كەمالوۆ ەلىمىزدە قالا ينفراقۇرىلىمىنىڭ ءبۇلىنۋى مەن زاڭسىز گراففيتي سالۋ فاكتىلەرىن جەدەل انىقتاۋ ءۇشىن «ۆانداليزم قاۋپى جوعارى ايماقتار كارتاسىن» قۇرۋدى ۇسىندى. بۇل تۋرالى ول پرەمەر-مينيستر ولجاس بەكتەنوۆكە جولداعان دەپۋتاتتىق ساۋالىندا ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، جاۋاپكەرشىلىكتىڭ كۇشەيتىلگەنىنە قاراماستان، كوشەدەگى ۆانداليزم ماسەلەسى وزەكتى بولىپ وتىر. مەيرامباي كەمالوۆ قوسىمشا شارالار قابىلداۋ قاجەتتىگىن مەملەكەت باسشىسىنىڭ زاڭسىز گراففيتي سالۋعا قاتاڭ توسقاۋىل قويۋ جانە مۇنداي ارەكەتتەردى ۆانداليزم ءارى بۇزاقىلىق رەتىندە قاراستىرۋ جونىندەگى تاپسىرماسىمەن بايلانىستىردى.
دەپۋتات زاڭ بۇزۋشىلار جەدەل انىقتالمايتىنىن اتاپ ءوتتى. ونىڭ سوزىنشە، عيماراتتاردىڭ قاسبەتتەرىنە، ايالدامالارعا، جەراستى وتكەلدەرىنە جانە باسقا دا قوعامدىق ورىندارعا گراففيتي مەن ءتۇرلى بەينەلەر كوبىنە بىرنەشە مينۋتتىڭ ىشىندە، نەگىزىنەن تۇنگى ۋاقىتتا سالىنادى.
سونداي-اق ول زاڭدى ستريت-ارت ءۇشىن ارنايى جابدىقتالعان قالالىق الاڭداردىڭ جەتكىلىكسىزدىگىن مالىمدەدى. باقىلاۋدى كۇشەيتۋ ماقساتىندا مەيرامباي كەمالوۆ ىشكى ىستەر مينيسترلىگىنە باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ «قىلمىستىق قۇقىق بۇزۋشىلىقتار كارتاسىنا» ۇقساس «ۆانداليزم قاۋپى جوعارى ايماقتار كارتاسىن» قۇرۋدى ۇسىندى.
دەپۋتاتتىڭ باستاماسىنا سايكەس، كارتا ناقتى ۋاقىت رەجيمىندە گەوگرافيالىق كوورديناتتار بويىنشا پروبلەمالى اۋماقتاردى كورسەتۋى ءتيىس. بۇل سول اۋماقتاردا نىسانالى پروفيلاكتيكالىق شارالاردى قابىلداۋعا، پاترۋلدەۋ مەن بەينەباقىلاۋدى كۇشەيتۋگە، جارىقتاندىرۋ جانە اباتتاندىرۋ جۇمىستارىن جاقسارتۋعا مۇمكىندىك بەرەدى.
سونىمەن قاتار دەپۋتات قۇقىق بۇزۋشىلىقتاردىڭ الدىن الۋ ءۇشىن «سەرگەك» جۇيەسىن قوسا العاندا، قولدانىستاعى تسيفرلىق جۇيەلەرگە بەينەاناليتيكا جانە بەت-الپەتتى تانۋ الگوريتمدەرىن ينتەگراتسيالاۋدى ۇسىندى.
كەمالوۆ ۇكىمەتكە باس پروكۋراتۋرامەن بىرلەسىپ، عيماراتتاردىڭ قاسبەتتەرى مەن باسقا دا ورتاق پايدالانىلاتىن نىساندارعا گرافيكالىق جانە وزگە دە بەينەلەردى رۇقساتسىز سالۋعا تولىق تىيىم سالۋ ماسەلەسىن قاراستىرۋدى ۇسىندى.
