وسكەمەندە پوليتسەيلەر وزەنگە اعىپ كەتە جازداعان انا مەن بالانى قۇتقاردى. بۇل تۋرالى Polisia.kz جازدى، دەپ حابارلايدى «ادىرنا» ءتىلشىسى.
وقىس وقيعا 17 شىلدە كۇنى ساعات 14:20 شاماسىندا بولعان.
"102" جەدەل ارناسىنا وسكەمەن قالاسىنىڭ تۇرعىنى ءۇلبى وزەنى ماڭىندا تانىسى كىشكەنتاي قىزىمەن بىرگە سۋعا تۇسكەنىن جانە ولاردى قاتتى اعىس الىپ كەتكەنى تۋرالى حابارلاعان. دابىل تۋرالى اقپاراتقا جەدەل ارەكەت ەتكەن كەزەكشى كومەكشىسى ولجاس ورازوۆ بولدى. ول تەك جاقىن ماڭداعى پاترۋلدىك پوليتسيا ەكيپاجىنا حابار بەرىپ قانا قويماي، ناقتى كوورديناتتار بويىنشا ولاردى باعىتتاپ وتىردى. وسى ۇيلەسىمدى ءىس-قيمىلدىڭ ارقاسىندا وقيعا ورنىنا پاترۋلدىك پوليتسيا باتالونى روتاسىنىڭ كومانديرى ماديار مۇحامەدجانوۆ باسقارعان №9 ەكيپاج شۇعىل جەتتى. بۇل ۋاقىتتا راتسيادان حاباردى ەستىگەن ءۇلبى پوليتسيا ءبولىمىنىڭ كريمينالدىق پوليتسيا باستىعىنىڭ ورىنباسارى سۇنعات سەيىلجانوۆ تا جاقىن ماڭدا بولىپ، ءوز بەتىمەن وزەنگە جەتكەن. ول ءبىرىنشى بولىپ كەلىپ، بىردەن سۋعا سەكىردى. سول ساتتە اناسى مەن بالاسىن اعىس ەداۋىر قاشىقتىققا الىپ كەتكەن ەدى، الايدا وفيتسەر ولارعا جەتىپ، سۋدىڭ بەتىندە ۇستاپ تۇرا الدى. كوپ ۇزاماي قاراما-قارسى جاعادان جەتكەن مۇحامەدجانوۆ كومەككە قوسىلدى. الايدا قاتتى اعىس سالدارىنان ءوز بەتتەرىنشە جاعاعا شىعۋ مۇمكىن بولمادى. پوليتسەيلەر قۇتقارۋشىلاردىڭ قايىقپەن كەلۋىن كۇتتى. ۇيلەسىمدى ءىس-ارەكەت پەن جەدەل شەشىم قابىلداۋدىڭ ارقاسىندا قايعىلى جاعدايدىڭ الدىن الۋ مۇمكىن بولدى",—دەلىنگەن حابارلامادا.
پوليتسيانىڭ مالىمەتىنشە، قازىرگى ۋاقىتتا اناسى مەن قىزىنىڭ ومىرىنە قاۋىپ جوق. وقيعانىڭ ءمان-جايى انىقتالىپ جاتىر.
