مىناۋ الاش يدەياسى دەگەن بار. الاش پارتياسى بار. سونى قۋعىن-سۇرگىن قۇرباندارىن ەسكە الۋ كۇندەرى، اناۋ-مىناۋ اتاۋلى كۇن مەن الدەبىر شەنەۋنىكتەر جولداۋ-مولداۋدا ايتقاندا بيۋروكراتتار كەرەمەت الاششىل بوپ كەتەدى. قۇداي-وۋ، “الاش” دەپ ەڭىرەگەندە قابىرعاسى قايىسادى.
بىراق، مەنى تاڭ قالدىراتىنى، مامبەت قويگەلدى، تۇرسىن جۇرتباي سياقتى كوكەلەر مەن حانكەلدى ءابجانوۆ، ايگۇل يسماقوۆا، سۇلتانحان ءجۇسىپ سياقتى تاريح زەرتتەۋشىلەرىن (تەك بۇل كىسىلەر ەمەس، كوپ قوي. مەن تەك ەسىمە تۇسكەنىن جازدىم) تىڭداساق… وتكەن ۇكىمەت تە، مىنا ۇكىمەت تە الاشتىڭ ماسەلەسىن شەشۋگە ات سالىسىپ جاتقانى شامالى سياقتى.
ودان دا ءبىر ۇقپايتىنىم، وسىدان 30-40 جىل بۇرىن ءولىپ قالعان كەڭەس وكىمەتىنىڭ وسىدان 100 جىل بۇرىن “حالىق جاۋى” دەپ جاپقان جالاسىنان نەگە اۆتومات اقتاي سالمايدى؟
مەن ەندى تاريحتان الىس، ءارحيۆتىڭ ءيسى مۇرنىما بارمايتىن اداممىن. الايدا، سۇيەگى ءشىرىپ كەتكەن نكۆد-نىڭ مۇراعات قۇجاتتارىن ءبىزدىڭ قر ءىىم نەلىكتەن قۇيرىعىنىڭ استىنا باسىپ وتىر؟ تسيفرلاندىرۋ، ۇرپاققا جەتكىزۋ، زەرتتەۋشىلەرگە جولا اشۋ دەگەن بولماي ما؟ الگى “الاش” دەپ ەڭىرەگەندە ەتەگى جاسقا تولاتىن شەنەۋنىكتەر سونداي كەزدە قايدا قالادى؟
اقش تەحنولوگيالىق جاعىنان دامىعانى دامىعان عوي. وعان ءسوز جوق. الايدا، اقش-تى تەحنولوگيالىق جاعىنان دامىتىپ تۇرعان جەكە، كوممەرتسيالىق، ۆەنچۋرلىق كومپانيالار. ال قوعامدىق سانا مەن الەۋمەتتىك تۇرعىدان دامىتىپ تۇرعانى - تاريحي جادىن وشىرمەگەندە. بۇلاردىڭ تاريحقا، وتكەنگە، مۇراعاتقا، مۋزەيگە، بۇرىنعىنىڭ كوزىنە قۇرمەتى - الەمدىك بەنچمارك دەۋگە دە كەلەتىن بولار.
ءتىپتى، قازاقتىڭ وتكەن-كەتكەنىن گەوگرافيالىق تۇرعىدان زەرتتەپ جۇرگەن كارتوگراف نۇرلان كەنجەاحمەت اعامىزدى حارۆارد ۋنيۆەرسيتەتى ارنايى ۇستاپ وتىر.
كەيدە وسى ماعان ءبىزدىڭ قازاقتى ءالى كۇنگە دەيىن قالىڭ ۇيقىدان ادەيى وياتپاي وتىرعانداي اسەر قالدىرادى.
قازاق ويانسا قوپارادى عوي، ويتكەنى… سودان قورقاتىن بولار.
شىركىن-اي دەيمىن كەيدە… “الاشتانۋشى، تاريحشى اتاقتى عالىمدارىمىزعا اي سايىن كەمىندە 5 ملن ستيپەنديا تولەپ، ولاردى كۇيبەڭ تىرلىكتەن ارىلتىپ، ايتارى مەن بەرەرىن تۇگەل سىعىپ قالار ما ەد” دەپ ويلايمىن. 4-5 جىلدىڭ ار جاق بەر جاعىندا ول كىسىلەر دە كەتپەستىڭ قايىعىنا مىنەر… مىنبەسە، ءارحيۆتىڭ شاڭى مەن چەكسيتەردىڭ لاڭى جۇيكەلەرىن توزدىرار. ال ءبىز ۋاقىت وتكەن سايىن الاش قايراتكەرلەرىنىڭ كوزىن كورگەن كىسىلەردىڭ كوزىن كورگەن ول كىسىلەردەن ايرىلامىز. مەنىڭشە، بۇل ءبىر ۇلكەن وكىنىش بولماق.
