اتىراۋداعى “شاڭىراق” بالالار ۇيىنە قاتىستى جەلىدە تاراعان ۆيدەوعا اتىراۋ وبلىسى اكىمىنىڭ ورىنباسارى جاسۇلان بيسەمبيەۆ پىكىر ءبىلدىردى، دەپ حابارلايدى “ادىرنا” ۇلتتىق پورتالى.
ايتۋىنشا، بولعان وقيعا بۇرىن قىزمەت ەتىپ كەتكەن جۇمىسشى مەن بۇرىنعى باسشى اراسىنداعى كەلىسپەۋشىلىكتەردىڭ ناتيجەسى ەكەن.
“وتباسى ۇلگىسىندەگى "شاڭىراق" بالالار اۋىلىنا قاتىستى بىرنەشە ماسەلەنى اشىپ ايتقىم كەلەدى. قازاقستان پرەزيدەنتى جانىنداعى بالالار قۇقىقتارىن قورعاۋ جونىندەگى ۋاكىل زاكيەۆا دينارا بولاتقىزىمەن بىرگە وتباسى ۇلگىسىندەگى "شاڭىراق" بالالار اۋىلىنا بارىپ، جاعدايدى زەردەلەدىك.
تۇيگەن ويىم، سوڭعى كەزدە جەلىدە قاتتى تالقىلانىپ جاتقان جاعدايلار ۇجىمدا بۇرىن قىزمەت ەتىپ كەتكەن جۇمىسشى مەن بۇرىنعى باسشى اراسىنداعى كەلىسپەۋشىلىكتەردىڭ ناتيجەسى. سالدارىنان بالالار زارداپ شەگىپ جاتىر. جەلىدە جاريالانىپ جاتقان ءتۇرلى جازبالاردا ەكى تاراپ ءوز-ءوزىن اقتاپ الۋعا تىرىسىپ جاتقانىن كورۋگە بولادى”، دەپ جازدى ول.
سونداي-اق، "شاڭىراق" بالالار اۋىلىنا جاڭا ديرەكتور تاعايىندالاتىنىن دا ايتا كەتتى.
”ەكىنشىدەن، بالانى وزىنە تارتىپ، ءتۇرلى ۆيدەو تاراتۋدىڭ ارتىندا - بالانىڭ قۇقىعىن شەكتەۋ ماسەلەسى تۇر.
بۇل بالالار - مەملەكەتتىڭ ەرەكشە قورعاۋىنداعى بالالار. سوندىقتان، مەملەكەت بالالاردىڭ قۇقىعىن قورعاۋعا ارنالعان بارلىق شارالاردى قابىلدايتىن بولادى. وعان قوسا، جەلى دە بولىپ جاتىرعان جاعدايلار، بالالاردىڭ وزدەرىن قاتتى الاڭداتىپ، بولاشاقتارىنا كەرى اسەرى بولادى دەپ ويلاپ وتىرعاندىعىن بايقادىم.
ۇشىنشىدەن، "شاڭىراق" بالالار اۋىلىنا جاڭا ديرەكتور تاعايىندالادى. قازىرگى ۋاقىتتا كونكۋرس جاريالاندى. پەداگوگيكا سالاسىندا مول ءبىلىمى مەن تاجىريبەسى بار مامانداردى وسى كونكۋرسقا قاتىسۋعا شاقىرامىن.
تورتىنشىدەن، "شاڭىراق" بالالار اۋىلىنداعى بەينەباقىلاۋ جۇيەسى كۇشەيتىلەدى. قازىرگى ۋاقىتتا مۇندا 64 بەينەكامەرا بار بولعانىمەن، قوسىمشا كامەرا قويۋ قاجەتتىلىگى بار دەپ ەسەپتەيمىن. جانە كامەرالار تىكەلەي ءبىلىم بەرۋ باسقارماسىنا قوسىلاتىن بولادى”، - دەدى جاسۇلان بيسەمبيەۆ.
سونىمەن قاتار، بالالار ۇيىندە ءباسپاسوز قىزمەتى اشىلادى. ول بالالار اۋىلىنداعى جاريالىلىقتى قامتاماسىز ەتەدى. ودان بولەك، جۋىق ارادا، شاڭىراقتان تۇلەپ شىققان بالالاردى ومىرگە تەز بەيىمدەۋگە باعىتتالعان تالىمگەرلىك جوباسى ەڭگىزىلەتىنىن دە ايتتى.
”قۇرمەتتى اعايىن، بالالارعا قاتىستى ءتۇرلى ۆيدەولار جاريالاپ، اقپارات تاراتۋدىڭ ارتىندا بالالاردىڭ قۇقىعىن شەكتەۋ ءارى قۇقىقتىق جاۋاپكەرشىلىك ماسەلەسى بار ەكەنىن اتاپ وتكىم كەلەدى.
قازىر بۇل ماسەلەلەر تۇراقتالىپ، بالالار قالىپتى ومىرگە قايتقانى ماڭىزدى”، دەپ ءسوزىن قورىتىندىلادى.
ايتا كەتەيىك، جەلىدە اتىراۋداعى «شاڭىراق» بالالار ءۇيىنىڭ تاربيەلەنۋشىسىنىڭ ۆيدەوسى تاراعانىن حابارلاعان ەدىك.
