موڭعوليانىڭ ۇلان-باتىر، حوبدا، بايان-ولگەي ايماقتارىندا موڭعوليا قازاقتارىنىڭ كىشى قۇرىلتايى ءوتىپ جاتىر. 4-10 شىلدە ارالىعىنا جوسپارلانعان ايتۋلى ءىس-شاراعا قازاقستان سىرتقى ىستەر مينيسترلىگىنە قاراستى «وتانداستار قورىنىڭ» ۇيىتقى بولعان. مەرەكەلى بوسقوسۋعا قايراتكەرلەر، ساياساتكەرلەر، اقىن-جازۋشىلار، عالىمدار مەن كاسىپكەرلەر قاتىسىپ جاتىر، دەپ حابارلايدى "ادىرنا" ۇلتتىق پورتالى.
قۇرىلتاي ماقساتى – شەتتەگى قانداستاردىڭ تۇيتكىلدى ماسەلەسىن انىقتاپ، ۇلتتىق قۇندىلىقتاردى دارىپتەۋ.
قۇرىلتايعا «وتانداستار قورىنىڭ» پرەزيدەنتى ابزال ساپاربەكۇلى، قازاقستان پارلامەنتى ءماجىلىسىنىڭ دەپۋتاتتارى، ديپلوماتيا ارداگەرلەرى، زيالى قاۋىم وكىلدەرى مەن قوعام قايراتكەرلەرى قاتىسۋدا.
«وتانداستار قورىنىڭ» پرەزيدەنتى ابزال ساپاربەكۇلى شەتتەگى قازاقتاردىڭ باسىن قوسقان جيىندا:
- الەمنىڭ قاي تۇكپىرىندە بولسىن قازاقتى قازاق ەتىپ تۇرعان – انا ءتىلى، اتا ءداستۇرى جانە كەڭ پەيىلى مەن باۋىرمالدىعى. ءبىز وسى قاسيەتىمىزدەن اينىماۋىمىز كەرەك. «بار قازاق – ءبىر قازاق» بولىپ تۇتاسىپ، بىرلىكتە بولساق، شىعار بيىگىمىز كوپ بولادى، - دەدى.
موڭعوليا قازاقتارىنىڭ كىشى قۇرىلتايى ۇلان-باتىردان باستالدى. بيىلعى 4 شىلدەدە قازاقستاندىق دەلەگاتسيا موڭعوليا استاناسى ۇلان-باتىردىڭ 5 مىڭنان استام قازاق تۇراتىن نالايح اۋدانىنا باردى. اۋدان اكىمى چ.رادناابازار جانە ءماسليحات دەپۋتاتتارىمەن كەزدەستى،
كەزدەسۋ بارىسىندا قور باسشىسى ابزال ساپاربەكۇلى موڭعولياداعى جانە قازاقستانعا كوشىپ كەلگەن قانداستارىمىز موڭعوليا مەملەكەتىنىڭ قامقورلىعىن ەرەكشە ىقىلاس-ريزاشىلىقپەن ەسكە الاتىنىن جانە بۇل شىن جۇرەكتەن شىققان ءسوز ەكەنىن اتاپ ءوتتى. ءسوزىن جالعاستىرا كەلە، قوعام باسشىسى موڭعوليا قازاقتارىنىڭ كىشى قۇرىلتايى اياسىندا جوسپارلانعان ءىس-شارالار تۋرالى ايتىپ ءوتتى.
ءوز كەزەگىندە، ءماجىلىس دەپۋتاتتارى ءۇنزيلا شاپاق، نۇرگۇل تاۋ جانە جارقىنبەك امانتاي موڭعوليا ەلىنىڭ تۋمالارى رەتىندە موڭعولياعا كەلگەندەرىنە قۋانىشتى ەكەنىن جانە پارلامەنتارالىق بايلانىستارعا ءوز ۇلەستەرىن قوسۋعا دايىن ەكەندەرىنە سەنىم ءبىلدىردى.
ءمالىم ەتىلگەندەي، قۇرىلتاي اياسىندا رەسەيدەگى قانداستارمەن دە جۇزدەسۋ جوسپارلانعان.
ماسەلەن، 8-9 شىلدەدە رەسەي فەدەراتسياسىنىڭ التاي رەسپۋبليكاسىنداعى قازاقتار مەكەندەيتىن قوساعاش اۋدانىندا جانە التاي ولكەسى ورتالىعى بارناۋلداعى قانداستارمەن كەزدەسۋ ءوتىپ، رۋحاني كەش ۇيىمداستىرىلادى.
"ادىرنا" ۇلتتىق پورتالى
