وزبەكستاننىڭ بۇحارا وبلىسى پەشكى اۋدانىنداعى گازلي كەنتىنىڭ سولتۇستىگىندە سوڭعى التى اي ىشىندە كليماتتىق نورمادان ءۇش ەسە كوپ جاۋعان جاۋىن-شاشىننىڭ اسەرىنەن ءىرى سۋ ايدىنى پايدا بولدى، دەپ حابارلايدى «ادىرنا» ءتىلشىسى fergana.news-كە سىلتەمە جاساپ.
بۇعان دەيىن سۋسىز ايماق سانالعان «شۋربۇلاق» اۋماعىندا قالىپتاسقان جاڭا كولدىڭ قازىرگى اۋدانى شامامەن 80 شارشى شاقىرىمدى قۇرايدى. كولدىڭ پايدا بولعانى تۋرالى اقپارات وزبەكستان ەكولوگيالىق پارتياسىنىڭ رەسمي Telegram-ارناسىندا جاريالانعان.
اۋقىمى جاعىنان بۇل سۋ ايدىنى بۇحارا قالاسىنىڭ اۋماعىنان الدەقايدا ۇلكەن جانە ەلدەگى ءىرى گيدرولوگيالىق نىسانداردىڭ ءبىرى – شارۆاك سۋ قويماسىمەن شامالاس. ماماندار كولدىڭ قالىپتاسۋىنا تابيعي فاكتورلارمەن قاتار ادام ارەكەتىنىڭ دە ىقپال ەتكەنىن اتاپ وتۋدە.
اتاپ ايتقاندا، سۋ شارۋاشىلىعى مينيسترلىگىنىڭ وڭىردە بالىق شارۋاشىلىعىن دامىتۋ باعدارلامالارى اياسىندا شاعىن ارنالار قازىلىپ، سول ارقىلى ماڭايداعى اۋماقتاردىڭ جەر استى سۋلارى جاڭا كولگە باعىتتالعان. كولدى سۋمەن قامتاماسىز ەتەتىن كوللەكتورلىق ارنانىڭ جالپى ۇزىندىعى شامامەن 126 شاقىرىمدى قۇرايدى. قوسىمشا سۋ اعىنى مول جاۋىن-شاشىنمەن ۇشتاسىپ، سۋ ماسساسىنىڭ جىلدام جينالۋىنا سەبەپ بولعان.
ەكولوگتار شولەيت ايماقتا مۇنداي سۋ ايدىنىنىڭ پايدا بولۋى ەكوجۇيە مەن ءوڭىردىڭ سۋ تەڭگەرىمىنە اسەر ەتۋى مۇمكىن ەكەنىن ايتادى. ونىڭ وڭ اسەرلەرىمەن قاتار، بەلگىلى ءبىر ەكولوگيالىق تاۋەكەلدەر دە تۋىنداۋى ىقتيمال.
