قاسىم-جومارت توقاەۆ بۇرىنعى پرەزيدەنت نۇرسۇلتان نازارباەۆقا قاتىستى جاڭا زاڭعا قول قويدى. زاڭدا نازارباەۆتى ءوز اتىنداعى قۇرىلىمداردىڭ قامقورشىلىق كەڭەسىنىڭ باسشىسى مارتەبەسىنەن ايىرۋ قاراستىرىلعان، دەپ حابارلايدى "ادىرنا" ۇلتتىق پورتالى.
بۇعان قاتىستى اقوردانىڭ ءباسپاسوز قىزمەتى سەيسەنبىدە:
"مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىندەگى كاسىبي بىلىكتىلىك، مەملەكەتتىك ناگرادالار، الەۋمەتتىك قامسىزداندىرۋ جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى", - دەپ حابارلادى.
سونىمەن قاتار، مەملەكەت باسشىسى قاسىم-جومارت توقاەۆ "كاسىبي بىلىكتىلىك تۋرالى" زاڭعا قول قويدى.
بۇعان دەيىن سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ نازارباەۆتىڭ وكىلەتىن شەكتەۋدىڭ بىرقاتار باعىتتارى جايلى ءسوز ەتكەن ەدى. دەپۋتات "نازارباەۆ ۋنيۆەرسيتەتى", "نازارباەۆ زياتكەرلىك مەكتەپتەرى" جانە "نازارباەۆ قورى" مارتەبەسى تۋرالى زاڭعا وزگەرىستەر ەنگىزىلەتىندىگىن ايتقان. سونىمەن قاتار، دەربەس ءبىلىم بەرۋ ۇيىمدارىنداعى جوعارى كەڭەس قامقورشىلارىن ايقىنداۋعا قاتىستى بىرقاتار تۇزەتۋلەر بولاتىنىن حابارلاعان.
توقاەۆ اتالمىش وزگەرىستەر مەن تولىقتىرۋلار ەنگىزىلگەن زاڭعا قول قويدى. ناتيجەسىندە، نازارباەۆ ءوز اتىمەن اتالعان دەربەس ءبىلىم بەرۋ ۇيىمدارىنان شەتتەپ، جوعارى قامقورشىلىق كەڭەسىنىڭ باسشىسى مارتەبەسىنەن ايىرىلادى.
نۇرسۇلتان ءابىشۇلى نازارباەۆ 1940 جىلدىڭ 6 شىلدەسىندە دۇنيەگە كەلگەن. كەزىندەگى "ەلباسى" ەكى كۇننەن كەيىن ءوزىنىڭ 83-جاسىن تويلايدى.
"ادىرنا" ۇلتتىق پورتالى
