Múftııat «Zam-Zam Qazaqstan» týrıstik kompanııasynyń basshysy Danııar Ilıevtiń ústinen sotqa shaǵym túsirmek. Bul týraly Qazaqstan musylmandar dinı basqarmasynyń (QMDB) Ortalyq apparaty jarııalady, dep habarlaıdy “Adyrna” ulttyq portaly.
Aıtýlarynsha, Danııar Ilıev múftııatqa jala japqan.
«Zam-Zam Qazaqstan» (zańdy ataýy – «Zam Zam store») kompanııasynyń jalǵan qujat rásimdep, qajylardy zańsyz jolmen Saýd Arabııasyna aparyp, jerlesterimizge jábir kórsetken áreketi qoǵamnyń nazaryn aýdardy.
Alaıda «Zam-Zam Qazaqstan» kompanııasynyń jetekshisi Danııar Ilıev óziniń sharıǵatqa jáne zańǵa qaıshy áreketin moıyndamaı, múftııatqa jala jabýmen shektelýde, dep jazdy QMDB Ortalyq apparaty.
Aıta keteıik, Danııar Ilıev «31 arna» telearnasynyń «50/50» áleýmettik tok-shoýynyń 2023 jylǵy 29 maýsym kúngi efırine bergen suhbat bergen bolatyn. QMDB Ortalyq apparaty onyń sózi eshqandaı dálelsiz, sóz jaýapkershiligin sezinbeı «múftııat týrfırmalardan ár qajy úshin 500 dollar para alady» degen mazmunda aýyr jala japqanyn aıtty.
Múftııat bul aqparattyń jalǵan ekendigin jáne Qazaqstan Respýblıkasynyń Ákimshilik quqyq buzýshylyq týraly Qazaqstan Respýblıkasynyń 2014 jylǵy 5 shildedegi № 235-V QRZ kodeksiniń 73-3 (jala jabý, ıaǵnı basqa adamnyń abyroıy men qadir-qasıetine nuqsan keltiretin nemese onyń bedelin túsiretin kórineý jalǵan málimetter taratý, kópshilik aldynda nemese buqaralyq aqparat quraldaryn nemese telekommýnıkaııalar jelilerin paıdalana otyryp jasalǵan dál sol is-áreket) «Jala jabý» babyna sáıkes D.Ilıevtiń ústinen sotqa shaǵym túsiretinin habarlaıdy.
Sonymen qatar quqyq qorǵaý organdary qajylardy osyǵan deıin aldap, dalada qaldyrǵan atalǵan kompanııanyń zańsyz áreketterine tez arada nazar aýdaryp, zań buzýshylardy quqyqtyq jaýapkershilikke tartý boıynsha tıisti sharalar qoldanady dep senemiz.
Qazaqstan azamattaryn aldaǵy jyldary osy sekildi alaıaqtardyń tuzaǵyna túsip qalmas úshin, qajylyq konkýrsynan ótken, ıaǵnı qajylyq saparyn uıymdastyrýǵa qabiletti dep tanylǵan, múftııat jarııalaǵan tizimge saı týroperatorlar qyzmetine júginý qajettigin taǵy da qaperge salamyz, dep jazdy.
