Freedom Finance پەن قازتاگ اراسىنداعى سوت پروتسەسى جابىق فورماتتا وتەتىن بولدى. مۇنداي شەشىمدى الماتى قالاسىنىڭ مەدەۋ اۋداندىق سوتى قابىلدادى، دەپ حابارلايدى “ادىرنا” پورتالى Ulysmedia-عا سىلتەمە جاساپ.
16 اقپاندا وتكەن سوت وتىرىسىندا سۋديا جاڭاباەۆ Freedom Finance كومپانياسى وكىلدەرىنىڭ ءوتىنىشىن قاناعاتتاندىرىپ، ءىستى جابىق قاراۋ تۋرالى ۇيعارىم شىعاردى. كومپانيا قازتاگ-قا قارسى «ىسكەرلىك بەدەلىنە نۇقسان كەلتىرۋ» بابى بويىنشا تالاپ ارىز تۇسىرگەن.
Freedom Finance مۇددەسىن قورعاعان ادۆوكات انتون كامينسكي ءىس ماتەريالدارىندا جەكە دەرەكتەر، سونداي-اق بانك جانە قارجى قۇپياسىنا قاتىستى مالىمەتتەر بار ەكەنىن ايتتى. ونىڭ پىكىرىنشە، جۋرناليستەردىڭ سوتقا قاتىسۋى پروتسەسكە قىسىم رەتىندە باعالانۋى مۇمكىن.
ال قازتاگ وكىلدەرى بۇعان قارسىلىق ءبىلدىرىپ، سوت پروتسەسى اشىق ءوتۋى ءتيىس ەكەنىن جەتكىزدى. ولار ەگەر قۇپيا دەرەكتەر بولسا، تەك سول بولىگىن عانا جابىق فورماتتا قاراۋعا بولاتىنىن اتاپ ءوتتى. باسىلىمنىڭ ادۆوكاتى لەنا جيگالەنوك Freedom Finance شاعىمىندا بانك قۇپياسىنا جاتاتىن ناقتى دەرەك جوق ەكەنىن مالىمدەدى.
قازتاگ ديرەكتورى اسەت ماتاەۆ تا پروتسەستىڭ اشىقتىعىن قولداپ، جۋرناليستەردىڭ قاتىسۋى ماڭىزدى ەكەنىن ايتتى. ونىڭ سوزىنشە، تالاپ ارىزدا باستاپقىدا بانك قۇپياسى تۋرالى ماسەلە كوتەرىلمەگەن، ال ءىستى جابىق وتكىزۋ باستاماسى ءسوز بوستاندىعىن شەكتەۋ رەتىندە قابىلدانۋى مۇمكىن.
ىسكە ونلاين قاتىسقان ادۆوكات سۆەتلانا ورالباەۆا بۇل ماسەلەنى سوتتىڭ قاراۋىنا قالدىردى.
بىلتىر قازتاگ YouTube ارناسى مەن سايتىندا Freedom Finance كومپانياسىنداعى «الاياقتىق سحەمالاردان زارداپ شەككەندەر» تۋرالى بىرنەشە ماتەريال جاريالاعان. باسىلىم اقپارات كوزى رەتىندە ادۆوكات سۆەتلانا ورالباەۆانى جانە ءوزىن زارداپ شەككەندەر دەپ تانىستىرعان ازاماتتاردى اتاعان.
Freedom Finance بۇل جاريالانىمداردى نەگىزسىز ءارى بۇرمالانعان ايىپتاۋلار دەپ باعالاپ، «ۇيىمداستىرىلعان PR-شابۋىل» دەپ مالىمدەگەن. كومپانيانى رەسەيلىك كاسىپكەر، كەيىن قازاقستان ازاماتتىعىن العان ميللياردەر تيمۋر تۋرلوۆ باسقارادى. Forbes جۋرنالى ونىڭ بايلىعىن 5,8 ملرد دوللار دەپ باعالاعان.
بۇعان دەيىن قازتاگ ديرەكتورى اسەت ماتاەۆ پەن باس رەداكتورى ءامىر قاسەنوۆكە قاتىستى Freedom Finance شاعىمى نەگىزىندە قىلمىستىق كودەكستىڭ 274-بابى («جالعان اقپارات تاراتۋ») بويىنشا ءىس قوزعالعانى حابارلانعان.
سونداي-اق اقپان ايىنىڭ باسىندا قازتاگ Freedom Finance-ءتىڭ بۇرىنعى توپ-مەنەدجەرى تەمىرلان بەكوۆ تۇسىرگەن تالاپ ارىز بويىنشا سوتتا جەڭىسكە جەتكەنىن مالىمدەگەن. بەكوۆ باسىلىمدا جاريالانعان ماتەريالدى شىندىققا جاناسپايدى دەپ تانۋدى، ونى ءوشىرۋدى جانە مورالدىق وتەماقى ءوندىرۋدى سۇراعان. الايدا سوت تالاپ ارىزدى تولىق قاناعاتتاندىرماي، بەكوۆتەن قازتاگ وكىلىنىڭ شىعىنى رەتىندە 20 مىڭ تەڭگە ءوندىرۋ تۋرالى شەشىم شىعارعان.
