ەكس-پرەزيدەنت نۇرسۇلتان نازارباەۆتىڭ نەمەرە ءىنىسى، ۇلتتىق قاۋىپسىزدىك كوميتەتى (ۇقك) توراعاسىنىڭ بۇرىنعى ءبىرىنشى ورىنباسارى سامات ءابىش قاڭتار وقيعاسى بويىنشا ايىپتى دەپ تانىلىپ، شارتتى تۇردە سوتتالدى، دەپ حابارلايدى "ادىرنا" ۇلتتىق پورتالى «دات» گازەتىنە سىلتەپ.
«26 اقپاندا نۇرسۇلتان نازارباەۆتىڭ نەمەرە ءىنىسى، ۇلتتىق قاۋىپسىزدىك كوميتەتى توراعاسىنىڭ بۇرىنعى ءبىرىنشى ورىنباسارى سامات ءابىش جابىق سوتتىڭ شەشىمىمەن سەگىز جىلعا شارتتى تۇردە باس بوستاندىعىنان ايىرىلدى»، - دەلىنگەن ءماجىلىس دەپۋتاتى ەرمۇرات باپيدىڭ الەۋمەتتىك جەلىدەگى پاراقشاسىندا ماقالادان جاريالاعان ۇزىندىسىندە.
ەسكە سالايىق، نازارباەۆتىڭ نەمەرە ءىنىسى سامات ءابىش قاڭتار وقيعاسىنان كەيىن كوپ ۇزاماي ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى قىزمەتىنەن قۋىلدى.
2023 جىلدىڭ 19 قىركۇيەگىندە سامات ءابىشتىڭ ۇستىنەن قاڭتار وقيعاسى كەزىندە بيلىگىن جانە قىزمەتتىك وكىلەتتىگىن اسىرا پايدالانعانى ءۇشىن قىلمىستىق ءىس قوزعالعانى بەلگىلى بولدى.
2024 جىلدىڭ 15 قاڭتارىندا ءابىشتىڭ ءىسى سوتقا جىبەرىلىپ، 28 اقپاندا باس پروكۋروردىڭ ورىنباسارى اسەت شىڭداليەۆ بۇل ءىس سوتتا ەكەنىن مالىمدەدى.
