الەۋمەتتىك جەلىلەر مەن مەسسەندجەرلەردە زەينەتاقى تولەمدەرىن قايتا ەسەپتەۋ ارقىلى 30-50% ارتتىرۋ تۋرالى شىندىققا جاناسپايتىن اقپارات تارادى. ەڭبەك جانە حالىقتى الەۋمەتتىك قورعاۋ مينيسترلىگى بۇل حاباردى جوققا شىعارىپ، مالىمدەمە جاسادى، دەپ حابارلايدى "ادىرنا" ۇلتتىق پورتالى.
تاراتىلعان بەينەروليكتە زەينەتاقىنى ارتتىرۋ ءۇشىن 20 جىلدان اساتىن ەڭبەك ءوتىلى جانە ەڭبەك كىتاپشاسىندا بەلگىلى ءبىر جازبا بولۋى كەرەك ەكەندىگى باياندالادى.
كەيىننەن روليكتىڭ اۆتورى تولىققاندى مالىمەت الۋ ءۇشىن سىلتەمەگە ءوتۋدى سۇرايدى. رەسمي ەمەس اقپاراتقا قاتىستى ەڭبەك جانە حالىقتى الەۋمەتتىك قورعاۋ مينيسترلىگى تۇسىنىكتەمە بەردى:
«ازاماتتارعا تەكسەرىلمەگەن سىلتەمەگە كىرمەۋ، سونىمەن قاتار الاياقتار پايدالانا الاتىن كۇماندى ينتەرنەت-رەسۋرستاردا وزدەرىنىڭ جەكە دەرەكتەرىن قالدىرماۋعا كەڭەس بەرەمىز. اقپاراتتى تەك رەسمي كوزدەردەن پايدالانۋدى سۇرايمىز»،– دەپ ەسكەرتەدى مينيسترلىك.
"ادىرنا" ۇلتتىق پورتالى
