تۇركيا تاراپىنىڭ باستاماسىمەن ۆلاديمير پۋتين تۇركيا رەسپۋبليكاسىنىڭ پرەزيدەنتى رەجەپ تايىپ ەردوعانمەن تەلەفون ارقىلى سويلەستى، دەپ حابارلايدى “ادىرنا” ۇلتتىق پورتالى.
پۋتين ەردوعانعا رەسەيدەگى قارۋلى كوتەرىلىس ارەكەتى تۋرالى ايتىپ بەردى. ال تۇركيا رەسپۋبليكاسىنىڭ پرەزيدەنتى رەسەي باسشىلىعىنىڭ قادامدارىن تولىق قولدايتىنىن ءبىلدىردى.
كەلىسسوز بارىسىندا پرەزيدەنت ەردوعان پاراساتتىلىقپەن ارەكەت ەتۋدىڭ ماڭىزدىلىعىن اتاپ ءوتتى. رەسەيدەگى وقيعالاردان ەشكىم پايدا كورمەۋى كەرەكتىگى باسا ايتىلدى. وسى تۇرعىدا پرەزيدەنت ەردوعان تۇركيانىڭ بەيبىتشىلىك پەن تىنىشتىق جاعدايىندا وقيعالاردىڭ تەزىرەك شەشىلۋىنە ۇلەس قوسۋعا دايىن ەكەنىن ايتتى، دەلىنگەن حابارلامادا.
ەردوعاننىڭ ءپۋتيندى قولدايتىنىن كرەمل سايتى عانا حابارلادى. ەردوعاننىڭ رەسمي سايتىندا بۇل تۋرالى ازىرگە مالىمەت جوق.
ەسكە سالايىق، رەسەي پرەزيدەنتى پۋتين قازاقستان پرەزيدەنتى قاسىم-جومارت توقاەۆپەن دە تەلەفون ارقىلى سويلەسكەن بولاتىن.
ءوز كەزەگىندە، مەملەكەت باسشىسى “بۇل - رەسەيدىڭ جەكە ماسەلەسى ەكەنىن” باسا ايتتى.
