قازاقستان اۋماعىندا اتوم ەلەكتر ستانتسياسىن سالۋ ماسەلەسى بويىنشا رەفەرەندۋم وسى جىلدىڭ سوڭىندا ءوتۋى مۇمكىن ەكەنى ايتىلدى. بۇل تۋرالى قازاقستاننىڭ رەسەيدەگى ەلشىسى داۋرەن اباەۆ تاسس اگەنتتىگىنە مالىمدەدى، دەپ حابارلايدى “ادىرنا” ۇلتتىق پورتالى.
تىلشىلەر اباەۆتان قازاقستاننىڭ اەس سالۋداعى "روساتوممەن" بايلانىسى تۋرالى سۇرادى. اباەۆ وعان:
«مەملەكەت باسشىسى ءوزىنىڭ سايلاۋالدى تۇعىرناماسىندا دا كەز كەلگەن ستراتەگيالىق ماڭىزدى ماسەلەلەر جانە وزگە دە دۇنيەلەر رەفەرەندۋمدا شەشىلەتىنىن، ياعني حالىقتىڭ پىكىرىمەن ساناسۋ كەرەكتىگىن نىق ايتتى. بۇل ونىڭ بەرىك ۇستانىمى جانە مەنىڭ ويىمشا، قازاقستاندىقتار مۇنى وڭ باعالايدى. ءبىز مۇنى رەفەرەندۋمعا شىعارىپ وتىرمىز. قازاقستاندا اتوم ەنەرگياسىنا قاتىستى بەلگىلى ءبىر فوبيالار بار. سەمەي يادرولىق پوليگونى ۇزاق ۋاقىت بويى قازاقستان اۋماعىندا ورنالاسىپ، رەسپۋبليكا تاريحىندا دا، قازىرگى قالپىنا دەيىن دە ۇلكەن ءىز قالدىردى. بۇل جارىلىستاردىڭ سالدارى ءالى دە سەزىلۋدە. سوندىقتان بۇل قازاقستانداعى ءبىز ءۇشىن وزەكتى ماسەلە. ەگەر قازاقستان حالقى بۇل ۇدەرىستەردى قولداسا، رەفەرەندۋمنان كەيىن بىردەن ناقتىسى ايتىلادى. "روساتوم", ارينە، وسى سالاداعى كوشباسشىلاردىڭ ءبىرى، سوندىقتان مۇنداي شەشىم قابىلدانسا، روساتوم ارقاشان قىسقا تىزىمدە بولادى” دەپ جاۋاپ بەردى ول.
سونداي-اق، شەتەلدىك باق-تىڭ ءجۋرناليسى ەلشىدەن رەفەرەندۋمنىڭ وتەتىن مەرزىمى بەلگىلى مە دەپ سۇراعان بولاتىن.
«جوق. وسى جىلدىڭ سوڭىندا ءوتۋى مۇمكىن»، - دەپ جاۋاپ بەردى اباەۆ.
بىلتىر قىركۇيەكتە پرەزيدەنت قاسىم-جومارت توقاەۆ ەل اۋماعىندا اتوم ەلەكتر ستانتسياسى سالىنىپ-سالىنبايتىنىن حالىق رەفەرەندۋم ارقىلى شەشەتىنىن مالىمدەدى.
