دۋشانبە قالاسىندا رەسەي پرەزيدەنتى ۆلاديمير پۋتين مەن ازەربايجان پرەزيدەنتى يلحام اليەۆتىڭ العاشقى رەسمي كەزدەسۋى ءوتتى. بۇل ەكى ەل باسشىلارىنىڭ سوڭعى ءبىر جىل ىشىندەگى العاشقى تولىققاندى كەلىسسوزى بولىپ وتىر، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا ۆلاديمير پۋتين وتكەن جىلدىڭ جەلتوقسانىندا بولعان اۋە اپاتىنا رەسەيدىڭ قاتىسى بار ەكەنىن مويىندادى.
رەسەي پرەزيدەنتىنىڭ ايتۋىنشا، اۋە اپاتى كەزىندە ەكى زەنيتتىك زىمىران ازەربايجاندىق جولاۋشىلار ۇشاعىنا بىرنەشە مەتر قالعاندا جارىلعان. بۇل مالىمدەمە ازەربايجان تاراپىنىڭ ۇزاق ۋاقىتتان بەرگى تالاپتارىنىڭ ءبىرى بولاتىن.
پۋتين تاجىكستانعا مەملەكەتتىك ساپارمەن كەلگەن. ونىڭ اياسىندا تمد مەملەكەت باسشىلارى كەڭەسىنىڭ وتىرىسىنا قاتىسۋ جانە بىرقاتار ەكىجاقتى كەزدەسۋلەر وتكىزۋ جوسپارلانعان.
«ينتەرفاكس» اگەنتتىگىنىڭ حابارلاۋىنشا، پۋتين مەن اليەۆ سوڭعى رەت 2024 جىلدىڭ قازان ايىندا جۇزدەسكەن. بيىل قىركۇيەكتە ولار شىۇ ءسامميتى اياسىندا قىتايدا قىسقاشا عانا سويلەسكەن، بىراق تولىققاندى كەلىسسوز جۇرگىزىلمەگەن.
سونداي-اق، ەكى ەل كوشباسشىلارىنىڭ تەلەفون ارقىلى بايلانىسى دا سيرەك بولعان. سوڭعى رەت 7 قازاندا اليەۆ ءپۋتيندى تۋعان كۇنىمەن قۇتتىقتاۋ ءۇشىن حابارلاسقان، ال وعان دەيىن ناۋرىز ايىندا سويلەسكەن.
ەسكە سالايىق، AZAL اۋە كومپانياسىنىڭ جولاۋشىلار ۇشاعى بىلتىر 25 جەلتوقساندا اقتاۋ قالاسىنا جاقىن ماڭدا اپاتقا ۇشىراعان ەدى. ۇشاق بورتىندا بولعان 67 ادامنىڭ 38-ءى قازا تاۋىپ، 29-ى امان قالدى. الدىن الا مالىمەتتەر بويىنشا، ۇشاق رەسەيدىڭ اۋە كەڭىستىگىندە، گروزنىي قالاسىنىڭ ۇستىندە سىرتقى فيزيكالىق جانە تەحنيكالىق اسەردىڭ سالدارىنان اپاتقا ۇشىراعان.
