مەملەكەت باسشىسى قاسىم-جومارت توقاەۆ بۇگىن حالىقارالىق ۆولونتەرلەر فورۋمىنا قاتىسىپ، ۆولونتەرلىكتى دامىتۋ جانە حالىقارالىق قايىرىمدىلىق ۇيىمدارىنىڭ ىنتىماقتاستىعىن نىعايتۋ پەرسپەكتيۆالارى تۋرالى ايتتى، دەپ حابارلايدى «ادىرنا» ءتىلشىسى.
«ۆولونتەرلىك قوزعالىستى ۇزاقمەرزىمدى گرانت بەرۋ ارقىلى ىنتالاندىرۋ كەرەك. بۇل رەتتە مەملەكەتتىك جانە جەكە گرانت بەرۋشىلەر اراسىندا تۇراقتى سەرىكتەستىك ورناتىپ، وتاندىق جانە حالىقارالىق دونورلاردىڭ ءبىر-بىرىمەن ناتيجەلى ىنتىماقتاستىعىن قالىپتاستىرۋ ماڭىزدى. ۆولونتەرلىك جانە قايىرىمدىلىق ىستەردى ينستيتۋتتىق تۇرعىدا قولداۋ ينفراقۇرىلىمىن دايەكتى تۇردە دامىتقان ءجون. ول ءۇشىن ۆولونتەرلەردىڭ ۇلتتىق جانە ايماقتىق دەڭگەيدەگى فرونت-ءوفيسىنىڭ ۇيىمداستىرۋشىلىق، تەحنيكالىق جانە كادرلىق الەۋەتىن كۇشەيتۋ قاجەت»،—دەدى پرەزيدەنت.
سونداي-اق قاسىم-جومارت كەمەلۇلى ۆولونتەرلىك قىزمەت سالاسىنداعى حالىقارالىق ىنتىماقتاستىقتى ودان ءارى نىعايتۋعا جانە ىلگەرىلەتۋگە ەرەكشە نازار اۋدارۋ قاجەتتىگىن اتاپ ءوتتى.
«مەن ءوزىم ەرىكتىلەردى بارىنشا قولدايمىن. سىزدەردىڭ تاباندى جۇمىستارىڭىزدى جوعارى باعالايمىن. ءبىزدىڭ ۆولونتەرلەر يوردانيا، كەنيا، تايلاند جانە تۇركيا ەلدەرىنە ارنايى بارىپ، تاجىريبە جيناقتادى. وسى تۇستا، مەن قازاقستان ەرىكتىلەرىنە قولداۋ كورسەتىپ جۇرگەن بۇۇ وكىلدەرىنە العىس ايتامىن. بىلتىر ەلىمىزدە ورتالىق ازيا ۆولونتەرلەرىنىڭ العاشقى فورۋمى ءوتتى. وسىنداي ماڭىزدى شارالار الداعى ۋاقىتتا دا جالعاسادى»،—دەدى ول.
