قازاقستان پرەزيدەنتى قاسىم-جومارت توقاەۆ ۇجىمدىق قاۋىپسىزدىك شارتى ۇيىمىنىڭ (ۇقشۇ) شاعىن قۇرامداعى سەسسياسىنا قاتىسىپ، ۇيىمنىڭ قاۋىپسىزدىك پەن تۇراقتىلىقتى قامتاماسىز ەتۋدەگى ءرولىن اتاپ ءوتتى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
سەسسيا وتىرىسىنا بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون جانە ۇقشۇ باس حاتشىسى يمانعالي تاسماعامبەتوۆ قاتىستى.
پرەزيدەنت قاسىم-جومارت توقاەۆ ۇقشۇ-نى ەۋرازيا كەڭىستىگىندەگى بەيبىتشىلىك پەن تۇراقتىلىقتى ساقتاۋدىڭ نەگىزگى قۇرىلىمدارىنىڭ ءبىرى دەپ اتاپ ءوتتى.
"ۇقشۇ مۇشە ەلدەر ءۇشىن قاۋىپسىزدىك كەپىلى ەكەنىن دالەلدەپ وتىر. ۇيىم مەملەكەتتەردىڭ ەگەمەندىگى مەن اۋماقتىق تۇتاستىعىن قورعاۋ ماقساتىندا كۇش-جىگەرىمىزدى بىرىكتىرەتىن بىرەگەي مەحانيزم", – دەدى توقاەۆ.
قازاقستاننىڭ ۇقشۇ-عا توراعالىعى كەزىندە ۇيىمنىڭ مۇمكىندىكتەرىن جەتىلدىرۋگە، تەرروريزم، كيبەرشابۋىل، ترانسۇلتتىق قىلمىس جانە ەسىرتكى اينالىمىنا قارسى ءىس-قيمىلدار تيىمدىلىگىن ارتتىرۋعا ەرەكشە نازار اۋدارىلعانى ايتىلدى. سونىمەن قاتار، ۇيىمنىڭ اسكەري وقۋ-جاتتىعۋلارى، مينيسترلىكتەر مەن كەڭەستەر دەڭگەيىندە كونسۋلتاتسيالار جوسپارلى تۇردە جۇرگىزىلدى.
سەسسيادا حالىقارالىق جانە وڭىرلىك قاۋىپسىزدىك ماسەلەلەرى تالقىلانىپ، ۇقشۇ-نىڭ الداعى جوسپارلارى ناقتىلاندى. قازاقستاننىڭ توراعالىعى كەزىندە قابىلدانعان باسىمدىقتاردىڭ بارلىعى جۇزەگە اسىرىلىپ، قويىلعان مىندەتتەر ورىندالعانى اتاپ ءوتىلدى.
پرەزيدەنت ۇيىم مۇشەلەرىنە قولداۋ مەن بىرلەسكەن جۇمىس ءۇشىن العىسىن ءبىلدىرىپ، ۇلى جەڭىستىڭ 80 جىلدىعىنا دايىندىققا ەرەكشە كوڭىل بولىنگەنىن جەتكىزدى.
جيىن قورىتىندىسىندا 2024 جىلعى توراعالىق جوسپارلارى ايقىندالىپ، ۇجىمدىق قاۋىپسىزدىك كەڭەسىنىڭ مالىمدەمەسى ۇسىنىلدى.
